Endamê Desteya Hevserokatiya Rêveber a PYDê û siyasetmedarê Kurd Salih Muslim, di 40emîn roja şehadeta xwe de li ser gora xwe bi merasîmek girseyî hate bibîranîn.
Endamê Desteya Hevserokatiya Rêveber a PYDê û siyasetmedarê Kurd Salih Muslim, di 40emîn roja şehadeta xwe de li ser gora xwe ya li Pakrewangeha Şehîd Dîcleyê bi tevlîbûneke girseyî hat bibîranîn. Di merasîma bîranînê de malbat û hevrêyên Salih Muslim, nûnerên saziyên sivîl, partiyên siyasî, rêxistinên jinan, her wiha fermandarên Hêzên Sûriyeya Demokratîk (HSD) û Hêzên Ewlekariya Hundirîn amade bûn. Merasîm bi deqeyek rêzgirtinê ji bo bîranîna cangoriyên azadiyê dest pê kir.
‘Heta kêliya dawî dest ji têkoşînê berneda’
Hevserokê Meclisa Giştî ya PYDê Xerîb Xiso, di destpêka merasîmê de axivî û sersaxî ji malbat û gelê azadîxwaz re xwest. Xiso bal kişand ser keda Salih Muslim a ji bo doza Kurdî û wiha axivî: “Di kesayeta şehîd Salih Muslim (Bavê Welat) de em hemû cangoriyên azadiyê bi bîr tînin û bi rêzdarî bejna xwe li ber wan ditewînin. Em çiqasî li ser wî biaxivin jî, li gorî têkoşîn û berxwedana ku wî dida meşandin gotin têr nake. Ew ji bo doza gelê Kurd her tim di nava têkoşînê de bû û heta kêliya dawiyê dest ji berxwedanê berneda. Divê em jî xwedî li têkoşîna wî derkevin û bibin şopdarên rêya wî.”
Eyşe Efendî: Em bi şehadeta wî serbilind in
Hevjîna Salih Muslim, Eyşe Efendî jî di merasîmê de xêrhatina beşdaran kir û soza domandina têkoşînê da: “Em wekî malbata şehîd Salih Muslim bi şehadetê serbilind in. Em ê her tim ji bo doza gelê Kurd di nava têkoşînê de bin û şopdarên rêya şehîdên xwe bin.”
YPJ: Em ê mafên jinan di destûra nû de misoger bikin
Ji fermandarên Yekîneyên Parastina Jin (YPJ) Rohilat Efrîn jî di axaftina xwe de bal kişand ser girîngiya xeta azadiyê û vîna jinan a ji bo sererastkirinên qanûnî: “Em ê bi hemû hêza xwe têkoşînê bikin heta ku mafên jinan di destûra nû ya Sûriyeyê de werin misogerkirin. Em bi saya şehîdên xwe gihîştin vê astê, em ê her tim bibin şopdarên rêya wan.”
Piştî axaftinan, girseyê qurnefîl û gul danîn ser gora Salih Muslim. Merasîma bîranînê bi berzkirina dirûşmeyên “Şehîd namirin” û “Berxwedan jiyan e” bi dawî bû.
