Şaredariya Peyasê di çarçoveya “1emîn Hevdîtinên Peyasê” de çalakiya xwe ya 10emîn li gundê Fenûşê li dar xist. Bername bi beşdariya girseyî ya gundiyan di nava coşeke mezin de pêk hat.
Şahiyên ku di destpêka havînê de ji aliyê Şaredariya Peyasê ve hatibû destpêkirin, bênavber berdewam dike. Bernameya 10emîn a van rêze çalakiyan li gundê Fenûşê ya ser bi navçeya Peyasa Amedê ve hate lidarxistin. Şahî bi beşdariyek girseyî ya gundiyan û coşek mezin hate birêvebirin. Di şahiyê de kargehên taybet jî hatin lidarxistin. Tîmên tenduristiyê kontrolên giştî yên tenduristiyê û xizmetên lênihêrînê kir. Hevşaredara Peyasê Bêrîvan Gulşen Sîncar jî beşdarî şahiyê bû.
Bêrîvan Gulşen Sîncar bi jinên gund re civiya û li daxwaz, pêşniyar û nêrînên wan guhdarî kir. Sîncar bal kişand ser rola bingehîn a jinan a di civakê de û destnîşan kir ku projeyên şaredariyê yên ji bo piştgirî û bihêzkirina jinan dê bênavber berdewam bikin.
Şaredariya Peyasê ragihand ku ew ê tevahiya demsala havînê van çalakiyan berdewam bike.
Bernameyê heya derengiya şevê berdewam kir.
