Şaredariya Peyasê ji bo mamosteyên kreş û mala nihêrtinê û odeyên lîstikê yên zarokistana Xalxalok û Perperike ku di bin banê Midûriyeta Çand û Xizmetên Civakî de dixebitin, perwerdehiyek du rojan li dar xist.
Perwerdeya ku li avahiya şaredariyê pêk hat û ji aliyê Midûriyeta Parastin û Pêşvebirina Ziman û Midûriyeta Polîtîkayên Jinan yên Şaredariya Peyasê ve hatin birêvebirin. Perwerde du rojan berdewam kir. Di roja yekem de xebatkarên Midûriyeta Parastin û Pêşvebirina Ziman, li ser mijarên “Çar Şiyanên Bingehîn di Wergirtina Ziman de” û “Birêvebirina Krîzan di Polê de” agahî dan û nêrînên xwe parve kirin. Di roja duyemîn de jî Xebatkarên Midûriyeta Polîtîkayên Jinan li ser mijarên “Têgihaştina Laşî” û “Mahremiyeta Zarokan” gotaran pêşkêş kir.
Armanca sereke ya van rûniştinên perwerdeyê ew e ku zanîn û jêhatîbûnên mamosteyên zarokistanan werin xurtkirin û di pêvajoya perwerdehiya zarokan de rêbazên nû û bikêrhatî bên bikaranîn. Midûriyeta Çand û Xizmetên Civakî ya Şaredariya Peyasê da xuyakirin ku ew ê di demên pêş de jî perwerdehiyên ku di navbera zarok û mamosteyan de pêwendiyeke ahengdar ava dikin û pêşvebirina wan esas digirin bidomînin.


















