Navenda Nûçeyan – Roja ku Wezîrê Karên Derve yê Tirkiyeyê Hakan Fidan çû Şamê, hêzên HTŞê li Eşrefiye û Şêx Meqsûd êrîşî Kurdan kirin. Rojnameger Ceklîn Brîmo anî ziman ku ev êrîş ne tesedufî ye û di êrîşan de destê Tirkiyeyê heye.
Piştî êrîşa 6ê cotmehê taxên Eşrefiye û Şêx Meqsûd di bin dorpêça hêzên girêdayî hikûmeta Şamê de ne. Dorpêç didome.
Wezkîrê Karên Derve yê Tirkiyeyê Hakan Fidan, Wezîrê Parastinê yê Tirkiyeyê Yaşar Guler û Serokê MÎTê Îbrahim Kalin di 23ê kanûnê de çû Şamê. Şandeya wezîran a Tirkiyeyê li Şamê bi Serokê hikûmeta demki ya Sûriyeyê Ahmed Şara re hevdîtin kirin. Balkêş e roja şandeya Tirkiyeyê çû Şamê, hêzên HTŞê li Helebê êrîşî taxên Kurdan kirin.
Êrîş bi plan hatiye kirin
Rojnameger Ceklin Brîmo ku li Helebê geşedanan ji nêzîk ve dişopîne, têkildarî geşedanên li Helebê agahî dan. Ceklîn Brîmo destnîşan kir ku heta niha di navbera rêveberiya taxê û rayedarên hikûmeta demkî de hevdîtin pêk nehatiye, lê agirbestek hatiye îlankirin û wiha got: “Rêveberiya taxê her dem li ser peymana 1ê Nîsanê tev digerin û dixwazin xalên peymanê esas bigirin. Lê her dem hêza hikûmeta demkî hewl didin ku peymana 1ê Nîsanê binpê bikin. Demeke dirêj e hewl didin ku êrîş bikin û dawiya dawî êrîş kirin. Demek e dirêje amadekariyên êrîşê dikirin û ev êrîş hatibû plankirin. Balkêş e dema Wezîrê Karên Derve yê Tirkiyeyê Hakan Fîdan bi hikûmeta demkî re hevdîtin kir ev êrîşa li dijî taxan pêk hat. Destê dewleta tirk di van êrîşan û vî şerî de heye. Tirkiye naxwaze peymana di navbera hikûmeta demkî û rêveberiya xweser de pêk bê. Hêzên girêdayî hikûmeta Tirkiyeyê êrîşî taxan kiriye. Dibe ku niha bêdengî heye. Lê tax niha di bin dorpêçê dene.”
Hewldana êrîşên li dijî taxan didome
Rojnameger Ceklin Brîmo da zanîn ku niha hêzên asayişê li hundirê taxê parastina taxê dike û wiha berdewam kir: “Piştî êrîşan hêzên asayişê parastinê dike. Gel jî piştgiriyê dide parastinê. Her çend hikûmeta demkî îdîa dike ku êrîş ji hundirê taxê pêk hatiye jî, ev ne rast e. Dijberî vê yekê komên çekdar êrîşî gelê taxê kirine. Ewil hêzên girêdayî hikûmetê êrîş kirin û hêzên asayişê di êrîşê de birîndar bûn. Dronên hikûmetê li ser ezmanê taxê firiyan. Hewldanên êrîşan li ser taxan didome.”
Rojnameger Ceklîn Brîmo da zanîn ku hêzên asayişê ji bo parastina taxê di nava tevgerê de ye û wiha pêde çû: “Hêzên asayişê naxwazin êrîş pêk bên. Her dem dixwazin aramiyek û lihevhatinek hebe. Ji destpêka şoreşa Rojava heta niha ev taxên Kurdan 14 sal in di bin dorpêçê de ne. Gel ji ber ku her dim di bin dorpêçê û êrîşan de ne, xwedî tecrûbeyên gelek mezin in. Dê çawa xwe bi rêxistin bikin û li dijî êrîşan dê çawa xwe biparêzin xwedî vîneke gelek xurt e. Di dema êrîş pêk hat gel bi şev daket kolanan û çalakî li dar xistin. Li dora hêzên parastinê bûn yek. Tenê gelê Kurd li van taxan tune. Gelên din jî li van taxan dijîn. Gelên taxê bi hevre xwe diparêzin. Hewldanên asayişê ji bo parastina gelên taxê pir zêde ye.”
4 meh in tax di bin dorpêçê de ne
Ceklîn Brimo bi bîr xist ku di 1ê Nîsanê de peymana ku ji 14 xalan pêk dihat di navbera taxên Şêx Meqsûd-Eşrefiyê û hikûmeta demkî de hat îmzekirin. Li gorî peymanê diviya bû tax wekî xwe bimînin û hêzên ewlekariya hundirîn taxên xwe biparêzin. Xalên ku herdu aliyan li ser li hev kirin hatin îmzekirin. Lê berovajî vê yekê, du carin hewldanên êrîşên li dijî taxan pêk tên. Hewl didin êrîşî taxan bikin. Di 6ê cotmehê de carekê hewl dan derbasî taxê bibin. Dîsa di 23ê kanûnê de bi tang û topan êrîşên dijwar pêk anîn. Hemû aliyên taxê dorpêç kirin. Di êrîşan de jin û ciwanan jiyana xwe ji dest dan. Bi van êrîşan hewl didin ku taxê têxin kontrola xwe. Di encamê de agirbesteke demkî heye. Niha li taxan bêdengî heye. Li dervê taxan liv û tevgera hêzên hikûmetê didome. Dorpêça taxan didome. Ketin û derketina tune. Dorpêçek giran li ser taxan heye. Ji şerê 6ê Cotmehê heta niha 4 meh in herdu tax di bin dorpêçek giran de ne.”
