* Hevserokê Kongreya Gel Remzî Kartal derbarê geşedanên pêvajoya Aştî û Civaka Demokratîk û Lutkeya NATOyê ku dê li Enqereyê were lidarxistin de ji ajansa me re axivî. Remzî Kartal destnîşan kir ku bi astengkirina hevdîtina heyetê ya bi Rêberê Gelê Kurd Abdullah Ocalan re rê li ber provakasyonan tê vekirin û wiha got: “Diyar e îtîrazên dewletê li ser pêşniyariyên Rêber Apo hene. Heke li gel Rêber Apo mutabakatek çênebe, ew qanûn dê bibe pirsgirêkeke mezin.”
* Li Enqereyê 36emîn Lûtkeya NATOyê pêk tê. Sekreterê Giştî yê NATOyê beriya lûtkeyê di makaleyeke de diyar kiribû ku lûtke dê ji bo pêkanîna biryarên Lûtkeya Laheyê were lidarxistin û got li gor biryaran, dê hilberîna çekan zêdetir bibe û qala şer kir.
* Pisporê Îstîhdamê Sînan Ok ê ku beşdarî Komxebeta Aboriya Demoktatîk û Xwerêxistinkirina Aboriyê bûbû, bal kişand ser krîza kûr û rêjeya bilind a bêkariyê ya li Bakurê Kurdistanê û Tirkiyeyê û da zanîn ku heta pirsgirêka Kurd bi rêyên aştiyane çareser nebe û aboriya mêtingeriyê neguhere, krîza aborî û koçberiya ciwanan bi dawî nabe.
* Konferansa Hiqûqnasên Kurd ên Demokratîk, bi tevlîbûna parêzer û saziyên hiqûqê yên ji her çar aliyên Kurdistanê û Tirkiyeyê hatine li Amedê hat lidarxistin. Endamê Şaxa Komeleya Hiqûqnasên Azad a Colemêrgê Metîn Adiyaman û endama Şaxa OHDa Mêrdînê Seher Acar li ser armanca konferansê û statuya gelê Kurd axivîn û destnîşan kirin ku ji bo domdarî û serkeftina pêvajoya aştiyê, divê statuya gelê Kurd di Destûra Bingehîn de cih bigire û gavên dualî werin avêtin.
* Platforma Şiyar Be bi dirûşmeya ‘Li dijî hişbirê ji bo jiyaneke azad û aram rabin!’ pêngaveke nû ragihand û bang li hemû pêkhateyên civakê kir ku têkoşîneke hevpar bimeşînin. Endamên Platformê diyar kirin ku li dijî vê siyaseta şerê taybet, çareserî ne xelasiya şexsî, avakirina komîn û rêxistinbûn e.
* Li navçeya Rezan a Amedê, li etaba 6emîn a xaniyên TOKÎyê yên li taxa Oxlaxliyê ji ber xebatên bê zanyarî hatine kirin, pirsgirêkên binesaziyê û xemsariya rêveberiyê, welatî bezar bûne. Yek ji van mexdûran jî Hîlmî Atli ye. Atli tevî ku 8 meh û nîv berê mifteya xaniyê xwe girtiye jî ji ber kêmasiyên ku naqedin û herikîna avê, nikare bi malbata xwe re bibe xwedî cih û war. Hîlmî Atli yê ku di nav deyn û qeran de ye hewl dide mala xwe çêbike, bertek nîşanî mijûlkirinê da û wiha got: “Ne xanî kavir teslîmî me kirine.”
* Komîsyona Girtîgehan a ÎHDa Stenbolê ji bo Gurkan Turkoglû yê ku li dijî tecrîd û girtîgehên wekî bîrê, di çalakiya birçîbûnê de jiyana dest dabû dê li avahiya xwe ya Beyoglûyê daxuyanî bide. (12:00)
*Hêzên Ked, Aştî û Demokrasiyê li dijî Lûtkeya NATOyê ya li Enqereyê tê lidarxistin, dê ji Taksîmê heta Dolmabaxçeyê bimeşin. (19:00)
Kirmanckî
*Her cayê şaristanan nika binê adirê germê hamnanî de veşeno. La koyê Baxire û Warê Qoşan de dinya hîna wisarê verênî dana ramitene. Ma waşt ke rindekîyanê nê cayanê bimbarekan bi dimen û çend resman bare bikime.
