*Serokê Giştî yê Sendikaya DÎSK Basin-Îşê Tûrgût Dedeoglû û Serokê Giştî yê TGSê Gokhan Dûrmûş derbarê sansura dîjîtal de diyar kirin ku êdî astengkirina malperan, biryarên rakirina nûçeyan û sînorkirina hesabên medyaya dîjîtal bûne pirsgirêkeke sîstematîk ku rasterast bandorê li mafê agahiyê û mafê rojnamegeran ê nûçe dayînê dike û wiha gotin: “Berjewendiyên desthilatdaran bi van maf û azadiyan re nakokî çêdibe, zextên li ser azadiya çapemeniyê jî zêdetir dibin.”
*Mehmet Ozkan ê ku birayê wî Cuma Ozkan 43ê sal in di girtîgehê de diyar kir ku 43ê salên Cuma Ozkan ne tenê dîroka kesekî ye, parçeyek ji rûmet û nasnameya gelê Kurd e û wiha got: “Rêveberiya girtîgehê ji bo berdanê poşmaniyê lê ferz dike. Lê belê 43 sal piştî ku poşman nebû, ji vir û şûnde jî poşman nabe. Baweriya bi têkoşînê ji bo me wekî îbadetekê û em bawer dikin ku aştî dê Cuma û hemû girtiyên siyasî rizgar bike.”
*Derûnnas Laleş Ongun û Hevserokê Şaxa Egîtîm- Senê ya Hejmara 1an a Amedê Farûk Ercan derbarê êrîşên ku li ser dibistanan tên kirin de gotin ku êrîş encamên polîtîkayên desthilatdariyê ne û ji bo ev rewş were guhertin divê civak were guhertin.
*10emîn Pêşengeha Pirtûkan a Amedê dê di roja 8emîn de li Navenda Fûar û Kongreyê ya Navneteweyî ya Mezopotamyayê berdewam bike. (10:00-19:00)
*Şaxên ÎHDê yên Amed û Êlihê û Malbatên Windayan dê çalakiya xwe ya “Bila winda bên dîtin kujer bên darizandin” ku her hefte li dar dixin, bidomînin. (12.00)
*Dayikên Şemiyê dê li Qada Galatasarayê çalakiya xwe ya heftane berdewam bikin. (12:00)
*Komîsyona Girtîgehan a ÎHDa Stenbolê ji bo girtiyên nexweş dê di hefteya 758emîn de Rûniştina Fyê li dar bixe. (13.30)
*Bi boneya salvegera Qetlîama Vartînîsê li Stenbolê danîşana Belgesela Vartînîsê were li dar xistin. (16.30)
Kirmanckî
* Denîz Gunduzî derheqê Fuarê Kitaban ê Amedî de qisey kerd û vat: “Eleqe seba kitabanê zazakî serre bi serre zêde beno. Merdimî yenê û pers kenê ke derheqê zazakî de çi xebatî est ê. No rind o, la tayê problemê ci est ê û helbet bes nîyo.”
