* Parlamenterê DEM Partiyê yê Şirnexê Mehmet Zekî Îrmez derbarê rêya di navbera Şirnex û Wanê de ku ev 13 sal in nayê xelaskirin axivî û got ku dema ji bo rêyên ewlehiyê be, pere heye lê dema ji bo rêyên civakî be pere nayê şandin.
* Dayika Medenî Yildirim, Fexriye Yildirimê behsa kurê xwe yê di 28ê Hezîrana 2013an de di çalakiyeke protestoyî ya li dijî çêkirina qereqolê de hatibû kuştin kir û diyar kir ku her çend zext, girtin û kuştin li ser gelê Kurd berdewam bike jî divê têkoşîna ji bo aştiyeke bi awayeke rûmetdar berdewam bike.
* Girtiyê nexweş Mehmet Elçe tevî rapoa ATKê ya “Nikare di girtîgehê de bimîne” nayê berdan. Kurê Mehmet Elçe, Huseyîn Elçe bal kişand ser rewşa dawî ya bavê xwe û got: “Nexweşiyên wî her ku diçe zêdetir dibin. Niha êdî nikare bimeşe û tenê bi alîkariya kursiya biteker bi rê ve diçe. Divê demildest were berdan.”
* Gerînendeyê Giştî yê Nûbiharê Suleyman Çevîk diyar kir ku dema komar ava bûye li ser Kurd û Kurdî bi înkarê dest pê kiriye û wiha got: “Demek dirêj di komarê de hebûna Kurdan hatiye înkarkirin. Têkoşîna Kurdan ew atmosfera hişk şikand. Divê Kurdî ji statuya dersa hilbijartî bê derxistin. Ji bo Kurdî pere bike divê statuya ziman hebe. Kovar û weşanxane ji bo gelek kesan bûn dibistan. Divê ji niha şûn ve Kurdî bêtir di nava mal û kolanan de belav bibe.”
* Siyasetmedarên Wanê banga tevlîbûna Mitînga Azadiyê kirin û diyar kirin ku azadiya Rêberê Gelê Kurd, azadiya civaka demokratîk û gelên bindest e.
* Rojnameger Reyhan Hacioglû ku bi salan li gel kedkarê Çapemeniya Azad Bayram Balci yê ku çend roj beriya niha jiyana xwe ji dest da, xebitiye, behsa dilsoziya hempîşeyê xwe kir û da zanîn ku Bayram Balci ji bo hemû rêhavalên xwe ji dil bû.
* Ji mamosteyên 12 rojin di çalakiya greva birçîbûnê de ne Serdar Akturk û Beytullah Kayaalp diyar kirin ku ew ê dev ji çalakiya xwe bernadin û xwestin daxwazên wan werin pêkanîn.
* Gerînendetîya Daîreya Karên Çand, Huner û Civakî ya Saredarîya Bajarê Mezin a Amedê dê li Çand Amedê kovara xêz û xêzeçirokan a bi navê BAJAR bide nasîn. (14:00)
* Rêxistinên mafên mirovan û hiqûqê dê bi boneya Roja Têkoşîna li Dijî Îşkenceyê û Piştgiriya Kesên ku Rastî Îşkenceyê Hatine re li Amed, Wan, Stenbolê û Îzmîrê daxuyanî bidin. (12:00-17:00)
* TJA û Meclîsa Jinan a DEM Partiyê a Îzmirê, dê derbarê cezayê ku li Ayşe Gokhanê hatiye birîn, li pêşiya Navenda Çandê ya Turkan Saylanê daxuyanî bidin. (18:30)
