Parlamentera DEM Partiyê ya Mêrdînê Salîha Aydenîz a di meşa li dijî êrişên li ser Rojava ya li navçeya Şemrexê hate lidarxistin de axivî û got: “Heta ku li Rojava çareseriyek çênebe dê gelê Kurd bi paş ve gavê neavêjin. Rojava dîrok nivîsand, ji cîhanê re bû ronahî.”
Platforma Saziyên Demokratîk a Mêrdînê têkildarî êrişên li dijî Rojava li navçeya Şemrexê ya Mêrdînê meşek li dar xist. Parlamentera DEM Partiyê ya Mêrdînê Salîha Aydenîz, hevşaredar, endam û rêveberên partiyên siyasî û saziyên sivîl di nav de gelek kes tev li meşê bûn.
Girseya di ketina navçeyê de kom bû dirûşmên “Bijî berxwedana Rojava” û “Rojava Rojhilat e, Kurdistan yek welat e” berz kir. Girseya xwest bimeşe lê polîsên ku ew dorpêç kirin biryara “qedexeyê” ya Walîtiya Mêrdînê hincet nîşan da û destûr neda girse bimeşe. Li ser vê yekê parlamentera DEM Partiyê ya Mêrdînê Salîha Aydenîz bertek nîşanî polîsan da û got: “Walîtiya Mêrdînê û Midûriyeta Polîsan a Mêrdînê bi pêkanînên xwe li pey provokasyonan e. Em bi gelê xwe yê ku bi komkujiyan re rû bi rû re ne. Em li kêleka kesên ji bo mirovahiyê li ber xwe didin e. Hûn li kêleka DAIŞê ne? Walîtiya Mêrdînê û Miduriyeta Polîsan a Mêrdînê li dijî pêvajoyê ne.”
Tevî astengkirinê meşiyan
Girse tevî hemû astengiyan derbasî Qada Bajêr bû û ji vir heta avahiya DEM Partiyê bi dirûşmên “Bijî berxwedana Rojava” meşiya. Girseya ku gihişt ber avahiya DEM Partiyê pankarta “Rojava berxwedan e, azadî ye, wijdan e, nikare teslîm bê girtin. Xwedîderketina li Rojava Xwedîderketina li Mirovahiyê ye” hilgirt û dowîzên “Rojava dilê Kurdistanê ye” , “Rojava kela berxwedanê ye” û “Li Kobanê zarok dicemidin” û posterên mezin ên keziyên hunandî yên şervanên YPJê li ser bûn hilgirtin.
‘Hûn bi vê nêzîkatiyê alîkariya çeteyan dikin’
Salîha Aydenîz a li vir axivî, helwesta polîsan şermezar kir û diyar kir ku pêkanînên Walîtiya Mêrdînê provokasyon e. Salîha Aydenîz bi lêv kir ku li dijî komkujiyên çeteyên DAIŞê dikin çalakiyan li dar dixin û wiha got: “Hûn bi vê nêzîkatiya xwe alîkariya çeteyan dikin. Vî gelî hûn nikarin bitirsînin ev gel bi awayekî serbilind li ser pêyan e.”
‘Ev têkoşîn ji hemû cîhanê re bû ronahî’
Salîha Aydenîz bal kişan ser dorpêça li ser Kobanê û wiha domand: “ Li Kobanê dorpêçek heye zarok ji ber sermayê mirin. Gelê Kurd wê Rojava bitenê nehêle ji ber ku li Rojava têkoşîna mirovahiyê tê kirin. Em ê bertekên xwe û serhildana xwe mezin bikin, dest ji van qedexeyan berdin. Li kêleka me nan û av nîne em ê çawa li mala xwe rûnin. Jinan li Rojava dîrok nivîsandin û şoreş pêkanîn. Ev têkoşîn ji hemû jinên cîhanê re bû ronahî. Tişta ku tê xwestin li Rojava bê kirin domandina tarîtiya DAIŞê ye. Bi rojane gel li ser piyan e, gelê Kurd li ser pêyan e û dibêjin gelê Kurd yek e. Em bi rojan e li ser pêyan in, em ê vê yekê bidomînin. Em ê têkoşîna jinan a li Rojava bilind bûye tu car bi tenê nehêlin.”
‘Deriyê Sînor ê Murşîtpinarê vekin’
Salîha Aydenîz diyar kir ku li dijî Rêberê Gelê Kurd Abdullah Ocalan propagandayeke reş tê kirin û wiha pê de çû: “Birêz Ocalan çawa li vir mîmarê aştiyê be damezrînerê pergala Rojava ye. Bi milyonan dibêjin birêz Ocalan îradeya me ye. Milyonan kes bûne yek dil û piştevaniya vê felsefeyê dikin. Dest ji reşkirina birêz Ocalan berdin. Ev polîtîkayên we li dijî têkoşîna gel pûç bûye. Gel îro bi Rojava re ye. Rojava xeta gel a sor e. Saziyên sivîl daxwaz kirin ku deroyê sînor vekin. Em jî ji vir bang dikin ku Deriyê Sînor ê Murşîtpinarê vekin. Gelê Kurd û kesên demokrasiyê dixwazin heta ku li Rojava çareseriyek çêbibe wê bi paş ve gavê neavêjin. Vê baş bizanin. Têkoşîna me dê bi serkeftinê tacîdar bibe.”
Daxuyanî bi dirûşmên “Bijî berxwedana Rojava” , “Rojava Rojhilat e Kurdistan yek welat e” û “Bijî berxwedana Kobanê” bi dawî bû.
