Çalakvan, welatî û rêxistinên Kerkûkê li dijî êrîşên li ser Efrîn, Şehbayê bertekên xwe anîn ziman û û bang li aliyên peywendîdar kirin ku deriyên sînorên Rojavayê Kurdistan yên li gel Herêma Kurdistan û Iraqê vekin.
Li Navenda Çandî ya Kerkûkê, sazî û çalakvanên bajarê Kerkûkê, derbarê rewşa Rojava Kurdistanê û koçberkirina şêniyên Kurd yên Efrîn û Helebê daxuyanî dan. Nûnerên saziyan piştgiriya xwe ji berxwedana gelê Rojava Kurdistanê anîn ziman. Parêzer Hejar Kakeyî li ser navê rêxistin û çalakvanên bajarê Kerkûkê daxuyanî da. Hejar Kakeyî bang li rayedarên Nûnerê Taybet yê Netewên Yekbûyî yê Iraqê, Serokatiya Komara Federal a Iraqê,
Serokatiya Desteya Wezîran ya Iraq a Federal, Serokatiya Herêma Kurdistanê, Serokatiya Hikûmeta Herêma Kurdistanê kir û xwest deriyen sinor vekin.
Hejar Kakeyî anî ziman ku wek komek rêxistin û çalakvanên civakî û welatiyên bajarê Kerkûkê vê daxwaznameyekê pêşkêşî van saziyan dikin û got: “Nerazîbûna xwe radigihînin li ser metirsiya ku li Sûriyê bi giştî û li herêmên Şehba û Tel Rifet û çend taxên bajarê Helebê yên Sûriyê de heye. Ev gef ji aliyê çend komên çekdar yên tundrew li dijî welatiyên Kurd yên sivîl tê meşandin. Nediyarbûna çarenivîsa zêdetir ji 15 hezar welatiyên Kurd ji jin û zarok û mêran pêk tê li herêmên Şehba, Tel Rifet û gundên derdorê ji aliyê van komên tundrew ve, destpêkeke metirsîdare ji bo qewimîna komkujiyeke mezin ku gelek dişibe proseya Enfal û karesata Helebceyê ya sala 1988an. Karesatek ku tê de artêşa Iraqê bi fermana dîktator Sedam Husên, jenosîda gelê Kurdistanê pêk anî. Ji ber van gefan, em daxwaz ji civaka navnetewî dikin ku di rêya hevpeymana navneteweyî ya li dijî koma terorîst ya ji hişmendiya DAIŞê pêk tê de gavên lezgîn bên avêtin.”
Hejar Kakeyî daxwazên xwe wiha rêz kir:
Yekem: Pêşîlêgirtina vê karesata mirovî û bi taybetî komkujiya welatiyên Kurd di rêya zextên lezgîn û cidî re ji aliyê wan dewlet û rêxistinan ve yên ku alîkariya wan dikin.
Duyem: Alîkariya mirovî ji bo parastina wan ji serma zivistanê û birçîbûnê.
Sêyem: Vekirina deriyên di navbera Herêma Kurdistanê û Iraqê digel Sûriyeyê, Deriyê Sêmêlka û heta sînorê El-Bukemal Qaîm li Remadiyê ji bo gihandina alîkariyên mirovî.
Di dawiyê de em bawer dikin ku mudaxeleya lezgîn û alîkariya bilez ya we birêzan dê ruhê paqij yê hezaran xelkên bêguneh ji gefa van koman û ji mirinê rizgar bike.
Li gel rêz û hurmetan
Koma Xak
Rêxistina Kerkûk ya Hemûyan
Encûmena Kurdî ya Kerkûkê
Koma Kerkûkê ya ji bo Pirsgirêkên Neteweyî
Rewşenbîr, çalakvan û kesayetiyên bajarê Kerkûkê.”
