Rêveberiya Kobaniyê diyar kir ku tevî sozên Hikumeta Demkî di civîna li Helebê de dane jî, heta niha tu gavên berbiçav neavêtine. Rêveberiyê got ku hêzên leşkerî yên Şamê hêj ji Çelebiyê venekişiyan e û dorpêça li ser Kobaniyê jî didome.
Rêveberiya Kobaniyê têkildarî dan û standinên xwe yên li gel rêveberiya parêzgariya Helebê daxuyaniyek da. Di daxuyaniyê de hate destnîşan kirin ku Hikûmeta Demkî hêj hêzên xwe ji Çelebiyê nekişandine û dorpêça li ser Kobaniyê jî didomine. Di daxuyaniyê de wiha hate gotin: “Li gorî Peymana 29ê Çileyê ya di navbera Hêzên Sûriyeya Demokratîk (HSD) û Hikumeta Demkî de hate îmzekirin gava yekemîn li navçeya Şêxler hat avêtin û entegrasyon di navbera hêzên ewlehiyê yên li wê deverê de pêk hat.”
Şandeyan li Helebê hemû mijar nîqaş kirin
Di daxuyaniyê de têkildarî hevdîtinên di navbera aliyan de pêk hatîn agahî hate dayîn û ev tişt hatin gotin: “Bi armanca çareserkirina pirsgirêkên şêniyan û vegera koçberan li malên wan, li gundewarê bajarê Kobanê civînek di navbera Rêveberiya Kobanê û cîgirê parêzgarê Helebê de bi amadebûna rûspiyên Kurd û Ereb pêk hat. Civîn bi encamên erênî bi dawî bû û di nav de cîgirê parêzgarê Helebê li ser navê parêzgar, Rêveberiya Kobanê vexwend ji bo civînekê serdana bajarê Helebê . Li ser vexwendina ku gihaşt Rêveberiya Xweser a Kobanê, şandeyek ji rêveberî û rûspiyên Kobanê di 5ê meha Sibatê de çûn Helebê û hevdîtin pêk anîn. Li wir hevdîtin bi cîgirê parêzgar û fermandarê Hêzên Ewlehiya Hundirîn a Parêzgeha Helebê re pêk hat.”
‘Soz dan lê bi cih neanîn’
Li ser mijarên lihevkirinê jî agahî hate dayîn û wiha hate gotin: “Di civînê de gelek dosyayên girîng ên têkildarî herêmê hatin nîqaşkirin. Di serî de gavên pratîk ên li navçeya Şêxler hatine avêtin. Ji bo navçeya Çelebiyê jî heman biryar hate destnîşankirin. Her wiha mijarên xizmetguzariyê mîna qutbûna av, elektrîk û înternetê hatin gotûbêjkirin. Lê belê tevî sozên ku nûnerên hikumetê di civînê de dan, heta niha ji aliyê hikumetê ve gavên berbiçav nehatine avêtin, bi taybetî vekişîna hêzên leşkerî ji Çelebiyê û rakirina dorpêça li ser bajarê Kobanê wekî xwe maye.”
‘Em ji bo Kobanê bikaranîna navê Eyn Ereb red dikin’
Rêveberiya Xweser bikaranîna navê Eyn el Ereb ji bo Kobaniyê jî bi tundî rexne kir û ev tişt destnîşan kirin: “Em wek Rêveberiya Kobanê teqez dikin ku daxuyaniyên piştre di çapemeniyê de hatine weşandin, xizmeta çareserkirina pirsgirêkan nakin. Bi tu awayî bi naveroka peymanê re li hev nakin. Her wiha pênasekirina Kobaniyê wekî ‘navçe’ û israra li ser bikaranîna navê ‘Eyn El Ereb’ li dijî rastiyên li ser erdê ne.”
‘Divê Şam berpirsyariyên xwe bi cih bîne’
Daxuyaniyê wiha dom kir: “Em careke din pabendbûna xwe bi xalên peymanê û pêkanîna wê ya li ser erdê re nîşan didin û diyar dikin ku em amade ne berpirsyariyên xwe bi cih bînin da ku ev pêvajo bi pêş ve biçe. Em bang li hikumeta Şamê dikin ku erkên dikevin ser milê xwe bi cih bîne û gavên pêwîst temam bike. Bi taybetî vekişandina hêzên leşkerî ji gundên di nav sînorên îdarî yên herêma Kobanê de, rakirina dorpêça li ser bajêr û rakirina astengiyên li pêşiya dabînkirina xizmetguzariyên bingehîn ji bo şêniyan.”
