Helbestvanê Kurd Rênas Jiyan di çarçoveya bernameyên 21ê Sibatê bi xwîner û hezkiriyên xwe re hatin cem hev û li ser roja ziman gotubêjek li dar xistin.
Bi pêşengiya Platforma Saziyên Ziman di çarçoveya bernameyên 21ê Sibatê Roja Zimanê Dayikê yê Cîhanê de li Amedê gelek bernameyên têr û tijî tên lidarxistin. Yek jî ji van bernameyan, bi tevlêbûna helbestvan Rênas Jiyan li Eywana Tahîr Elçî ya Baroya Amedê hat lidarxistin. Endam û rêvebirên Baroya Amedê, OHD, ÎHD, nunerên saziyên sivîl û gelek kes tevlî bernameyê bûn. Bername bi gotûbêjek li ser mijara Rojava û girîngiya ser zimanê Kurdî dest pê kir. Piştî gotubêjê Rênas Jiyan ji beşdaran re helbest xwend û pirtûkên xwe ji bo wan îmze kir.
‘Ji bo me pêtalek bû, meşaleyek bû di destê wî de dimeşiya’
Rênas Jiyan di destpêka axaftina xwe de Mehmet Emîn Bozarlasan ê ku demek nêz de jiyana xwe ji dest da bi bîr anî û wiha got: Ez mamosteyê qedirbilind û wek mamosteyê xwe, wek mamosteyê min ê yekem û mamosteyê me yê herî mezin Mihemed Emîn Bozarslan bi rêzdarî bi bîr tînim. Min gelekî jê sûd wergirt. Ji bo me pêtalek bû, meşaleyek bû di destê wî de dimeşiya. Ji wergerên wî yên kovara Jînê, rojnameya Kurdistanê, Mem û Zîn, Şerefnameya Şerefxan û gelek berhemên din ên hêja ji bin destê wî derketine, ez bi dilgeşî bi bîr tînim.
‘Kurd dikarin çarenûsa xwe diyar bikin’
Helbestvan Rênas Jiyan bal kişand ser mijara Rojava û da zanîn ku Rojava ji bo gelê Kurd hêviyeke û divê xwedî li Rojava were derketin û ev tişt gotin: “Li ser Rojava gelek êrişên mezin pêk hatin. Rojava ji bo me hêviyeke, hîn jî hêviye û em ê tu carî dest jê bernedin. Gava ku em dest ji Rojava bernedin, ne ku em ê dest ji Bakur jî bernedin an jî dest ji Rojhilat bernedin. Ji bo Rojhilat jî em piştevaniya xwe pêşkêş bikin. Em ji bo Rojava gelekî xemgîn bûn, Zarokên me qetil kirin, keziyên jinên Kurd jê birin. Ev ji bo me travmayeke mezin e. Em ê tu carî vê ji bîr nekin. Kesên ku bûne sedema vê nexweşiyê, em ê tu carî wan ji bîr nekin û li gorî wê em ê hiş û ramana xwe pêş bixin.”
‘Divê em xwedî li zimanê xwe derbikevin’
Rênas Jiyan destnîşan kir ku zimanê Kurdî her tim hatiye qedexekirin û wiha got: “Bi taybetî ji aliyê polîtîkayên dewletê ve zimanê me hatiye qedexekirin û gelê me hatine asîmîlekirin. Di vir de divê em hinek tiştên rast bibînin. Divê em xwedî li zimanê xwe derbikevin û di her qadê de biaxivin da ku zimanê me bi tunebûnê re rû bi rû nemîne.”
