Rêxistina Mafên Mirovan a HRANAyê ragihand ku rejîma Îranê danê siharê xwepêşanderek û di nava meha borî de jî 60 kesên din bidarvekiriye û bi vî awayî binpêkirinên xwe yên li dijî mafên mirovan dewam dike.
Rêxistina Mafên Mirovan a HRANAyê têkildarî binpêkirinên rejîma Îranê yên li dijî mafên mirovan ên li Rojhilatê Kurdistanê û Îranê di nava meha borî de raporek weşand.
Di raporê de hatiye diyarkirin ku dezgeha dadweriya Îranê danê siharê cezayê darvekirina xwepêşanderê bi navê Mecîd Nadîne, li parêzgeha Alborzê bi cih aniye. Mecîd ji aliyê îstîxbarata Pasdaran (Îtîlaat) ve li Keracê hatibû girtin û bi tometa “beşdarbûna di xwepêşandanan de bi mebesta rûxandina rejîmê” cezayê darvekirinê lê hatibû birîn.
Hate eşkerekirin ku di nava vê mehê de bi giştî 60 cezayên darvekirinê ku di nav wan de jin û zarok jî hene, hatine pêkanîn. Du doz bi awayekî giştî hatine kirin, di heman demê de ji aliyê dezgeha dadweriyê ve 11 cezayên nû yên darvekirinê hatine birîn û biryara 7 kesên din jî ji aliyê Dadgeha Bilind a welat ve hatiye pejirandin.
Ji aliyekî din ve, zextên li ser azadiya ramanê gihîştine lûtkeyê; bi awayekî ku 112 dozên girtin û serdegirtina malan hatine tomarkirin. Di encamê de bi giştî cezayê 5 hezar û 73 meh girtîgehê, 48 meh dûrxistin, 417 lêdanên qamçiyê û cezayên darayî li ser 70 welatiyan hatine sepandin. Her wiha cezayê 77 sal zindanê ji bo 16 welatiyên xelkê Mehabadê, mînakeke berçav a vê zordariya dadweriyê ye.
