Dadgeriya Îranê pênc kes bi darve kir ku bi endametiya komên Misilman ên Sûnî yên qedexekirî dihatin sûcdarkirin. Ji destpêka salê û vir ve herî kêm 245 kes hatin darvekirin.
Di daxuyaniya Rêxistina Mafên Mirovan Îranê (ÎHR) de ku navenda wê li Norwêcê ye, hate ragihandin ku roja Çarşemê li girtîgeha Vakilabad a li bajarê Meşhed ê li rojhilatê welêt, pênc kes bêyî ku agahî ji malbatên wan re bê dayin an jî destûra serdana dawî bê dayin, hatin darvekirin.
Dîrektorê ÎHRê Mahmood Amiry-Moghaddam pênc kesên hatin darvekirin weke ‘mehkûmên siyasî’ pênase kir û got: “Îşkence li van mehkûman hate kirin û bi rengekî ne adil hatin darizandin û bi cezayê mirinê hatin mehkûmkirin.”
Li gorî daxuyaniyê, çar ji van kesan endamên civateke Misilman a Sûnî bûn ku li Komara Îslamî ya Şîa ya Îranê hindikahî ye. Hate ragihandin ku kesê pêncemîn jî Şîa bû.
Îran li cîhanê piştî Çînê welatê sereke ye ku cezayê darvekirinê herî zêde pêk tîne. Li gorî ÎHRê ji destpêka salê û vir ve herî kêm 245 kes hatin darvekirin. ÎHRê diyar kir ku hejmara înfazan bi rengekî bi guman zêde bûye.
