Hêzên polîsên Iraqê dest danîne ser avahiya Şaredariya Gel a li komalgeha Girzerik a Şengalê. Tevî hemû hewldanan jî, hêzên polîsan ji şaredariyê dernakevin û şaredarî nikare xizmeta gelê ku vegeriyaye Girzerik bike.
Di fermana 2014an de, Girzerik yek ji wan gundan bû ku pêşengî ji berxwedana li dijî DAIŞê re kir. Ji ber vê, çeteyên DAIŞê herî zêde zirar dan Girzerik, piraniya malan wêran kirin. Piştî salan vegera gel a Girzerik destpêkiriye, Rêveberiya Xweser a Şengalê jî ji bo pêşwazîkirina pêdiviyên gel û xizmetgûzariyê beriya niha bi demekê xebatên Şarderiya Gel a Girzerik da destpêkirin. Lê ev saziya ku ji bo xizmeta gel hate avakirin niha ji aliyê hêzên polîsên Iraqê ve hatiye dagirkirin û rê nayê dayîn ku ev cih ji bo xizmeta gel were bikaranîn.
Li RojNewsê agahiyên ku bi dest xistin, ev hêz bêyî ku ti belge an jî hincetekê bidin nîşandan, dema karkerên şaredariyê di betlaneyê de bûn, hêza xwe birine wir û bicih kirine. Ji bo ku mijar were famkirin, gelek hewldan ji aliyê Rêveberiya Xweser a Şengalê û rayedarên şaredariyê ve hatine kirin, lê tenê polîsan gotiye ku biryarek ji wan re hatiye dayîn ku li wir bicih bibin.
Çavkaniyan diyar kir ku ev hêza polîsan bi talîmatên hêzên artêşa Iraqê ku li herêmê ne, derbasî navenda şaredariyê bûne.
Hêjayî bîrxistinê ye ku di 10ê Adara 2025an de, Rêveberiya Xweseriya Şengalê li gundê Girzerik, ku girêdayî nahiya Til Izêr e, avahiya şaredariyê vekiribû, ji bo xizmeta gelê herêmê bike û karibe pêwîstiyên malbatên nû vegeriyane wir bicih bîne.
