Polîsên ku bi ser Mala Hunerê ya Jîn Artê de girtin kamerayên ewlehiyê bêbandor kirin û li ser depê kursê ala Tirk xêz kirin.
Polîsan vê şeveqê li Îzmîrê bi ser gelek malan û bi ser Mala Hunerê ya Jîn Artê de girtin. Polîsan di dema serdegirtinê de deriyê Mala Hunerê şikandin, kabloyên kameraya ewlehiyê birîn û kamera bêbandor kirin. Lêgerîna saziyê bê agahiya rayedarên wê hate kirin. Gelek pirtûk, kovar û komputer hatin desteserkirin. Di lêgerîna nava saziyê de polîsan zirar dan hinek deriyan û li ser depê kursê jî ala Tirk xêz kirin.
Piştî lêgerînê, li pêşiya Mala Hunerê ya Jîn Artê daxuyanî hate dayin. Rêvebera Mala Hunerê ya Jîn Artê Belkisa Suleymanoglû diyar kir ku ji bo lêgerînê nehatine agahdarkirin û wiha got: “Bêyî sedemekê nîşan bidin ketine hundirê saziyê. Em vê qebûl nakin û şermezar dikin. Li ser depê kursê ala Tirk xêz kirin e. Di demên dawî de gelek bêhiqûqtî tên krin. Ev lêgerîn jî yek ji wan e.”
‘Polîtîkayên nenaskirina nasnameya Kurdan berdewam dike’
Parlamenterê DEM Partiyê yê Agiriyê Heval Bozdag jî diyar kir ku her roj bi bêhiqûqtiyeke nû re hişyar dibin û wiha got: “Ev polîtîkayên zextê yên desthilatê bi sala ye didome. Di demeke qala aştiyê tê kirin de desthilata AKPê dide hîskirin ku dê zexta xwe ya li ser civakê bidomîne. Em dixwazin li welatekî demokratîk bi nasnameya xwe û bi rûmet bijîn. Li vir li ser ziman û çanda Kurdî xebat tên kilrin. Daxwaza gelê Kurd ew e ku bi nasnameya xwe bijî. Heke tehemûla van xebatên li vê derê nekin, wê demê dê aştiyê li ser kîjan bingehê ava bikin. Polîtîkaya desthilatê ya nenaskirina nasnameya Kurdan didome. Zemîna aştiyê bi van polîtîkayan ava nabe. Em van êrişan û polîtîkayan şermezar dikin û dê têkoşîna me bidome.”
