Xwendekarên Zanîngeha Dîcleyê li ber êrişên li ser taxên Şêxmeqsûd û Eşrefiyê rabûn û êrişên li ser taxên Kurdan şermezar kir.
Xwendekarên Zanîngeha Dîcleyê ji bo ku êrîşên li ser taxên Şêxmeqsûd û Eşrefiyê protesto bikin, xwestin ji Fakulteya Hiqûqê heya Fakulteya Fênê bimeşin. Beriya meşê polîsan derdora xwendekaran girt û dorpêç kir. Polîsan dem bi dem êrişî xwendekaran kir û destûr nedan xwendekar bimeşin.
Xwendekar bi saetan di dorpêça polîsan de man û bi dirûşm, tîlîlî û stranan nerazîbûn nîşanî astengiya polîsan dan û dilsoziya xwe ya bi Rojava re anîn ziman. Xwendekarên ku bi saetan di dorpêça polîsan de man, kêliyek dengê dirûşm û stranên wan nesekinî û berz bû û olan da. Xwendekaran paşê daxuyanî da çapemeniyê.
Xwendekaran di çalakiyê de pankarta “Êriş, hovîtî, mirin. Em Rojava tenê nahêlin” vekirin û dirûşmeyên “Bijî Berxwedana Rojava”, “Rojava Rojhilat e Kurdistan yek welat e” berz kirin.
‘Zext li me hatin kirin’
Xwendekara Zanîngeha Dîcleyê Sîdar Kiye daxuyanî xwend û êrişên li ser taxên Helebê şermezar kir û wiha got: “Îro em wekî xwendekarên Zanîngeha Dîcleyê li vir kom bûne da ku denge xwe li hemberî komkujiya Rojava, kuştina jin û zarokan bilind bikin. Em li dijî êrişên Helebê li vê derê dengê xwe bilind dikin. Lê îro li vê derê zext li me hatin kirin. Em tundiya ku li me hate kirin qebûl nakin. Rektor û rêveberên zanîngehê jî hevkarên vê tundiyê ne. Zanîngeh serbixwe ye. Lê zextên li ser me tê kirin li dijî qanûnên wan in.”
