Stenbol – Li Tirkiyeyê bi salan e şerê taybet di asta herî jor de tê kirin. Di hedefa şerê taybet de niha jî zanîngeh hene. Wezareta Karên Navxwe derbarê zanîngehan de giştînameyek ji zanîngehan re şand. Li gorî giştînameyê xwendekar wekî “sûcdar” û zanîngeh jî wekî “hêlîna sûcdariyê” tê dîtin.
Beriya ku zanîngeh dest bi perwerdehiyê bikin di 11ê Îlonê de Wezareta Karên Navxwe ya Tirkiyeyê ji Muduriyeta Giştî ya Emniyetê, Fermandariya Giştî ya Cendirmeyan, Wezareta Ciwan û Werzişê, Saziya Perwerdehiya Bilind (YOK) û walîtiyên 81 bajaran re giştînameyekî şand. Giştîname ji 17 xalan pêk tê û xebatên siyasî yên xwendekaran weke “sûc û provakasyon” di vê giştînameyê de hatiye pênasekirin. Di giştînameyê de hatiye xwestin ku li dijî xwendekaran bi hinceta “sûc û provakasyonan” polîs û leşker li zanîngehan tedbîrê bigirin.
Polîtîkaya şerê taybet
Li Tirkiyeyê di salên dawî de êdî polîtîkaya şerê taybet derketiye asta herî bilind. Di çarçoveya polîtîkaya şerê taybet de bi operasyon, êriş, girtin, zext û îşkenceyê kes, kom, sazî an jî civak tê krîmînalîzekirin. Dewlet bi vê amûrê dixwaze propagandaya xwe bike û kes di warê azadiya ramanê û xwerêxistinêkirinê de li pêş nekeve. Li gorî vê giştînameya navborî çalakiyên ciwanên zanîngehan weke “propagandaya rêxistinê” tê dîtin û tê xwestin ku pêşî li xebatên ciwanan were girtin. Li gorî vê giştînameyê jî armanc û hedefa Wezareta Karên Navxwe ya derbarê xwendekaran de jî xwe eşkere dike. Wezareta Karên Navxwe jî bi peyvan weke, “teror”, “sûc” û “propagandayê” dixwaze rêxistinkirina ciwanan krîmînalîze bike.
Zanîngehan dê veguherînin qereqolan
Li Tirkiyeyê beşa herî bi dînamkîk ciwan in û ciwanan her dem pêşengiya civakê kiriye û li dijî neheqiyê li ber xwe dane. Ji ber van sedemên mafdar ciwan her tim ji aliyê dewletê ve bûne hedef. Giştînameya dawî ya Wezareta Karên Navxwe jî hedefgirtina ciwanan radixe ber çavan. Wezaret bi 17 xalên vê giştînameyê dixwaze zanîngehan bike weke “girtîgehê” û xwendekaran jî weke, “sûcdar” bibîne. Wezaret bi vê giştînameyê hewl dide sînyala pêşîlêgirtina çalakiyên xwendekaran bigire û zanîngehan veguherîne qereqol û biryargehên leşkerî.
Dixwazin xwendekaran bi şev û roj dorpêç bikin
Wezareta Karên Navxwe di nava zanîngehan de jî dixwaze tedbîr werin girtin. Li gorî daxwaza wezaretê, wezîfedarên ewlehiya taybet ên qada perwerdeyên bi navê “Bi civakê re têkilî, ragihandin, ji bûyerên civakî re mudaxile, psîkolojiya kom û kontrola hêrsê” tedbîrê bigirin. Ev yek bi eşkere xwe dide nîşandan ku perwerdehiyê dikin sedema şerê psîkolojîk. Wekî din Wezareta Karên Navxwe dixwaze ku di nava kampusên zanîngehan de kamera-mobese werin bicihkirin û her der were dîtin.
Wezaret bi vê giştînameyê dixwaze ku derbarê rêxistinên ciwana û çalakiyên ciwanan de agahiyên îstîxbaratê werin berhevkirin. Hesabên medyaya dîjîtal werin şopadin. Bi van kirinan tê xwestin ku li ser ciwanan her dem çavek hebe û ciwan ji bilî kontrola erkdarên şerê taybet gav jî nikaribin biavêjin.
Astengkirina vekirina standan
Her sal dema ku zanîngeh vedibin kom, grûp û rêxistinên ciwanan di nav zanîngehan de rojên danasînê li dar dixin. Di rojên danasînê de stand tên vekirin û danasîna kom, grûp û rêxistinan tê kirin. Vekirina standan bi giştînameyê hatiye hedefgirtin û tê xwestin vekirina standan werin astengkirin. Li şûna standên xwendekaran hatiye xwestin ku polîs standan vekin.
Ders, panelên bi navê ‘bêteror’ dê bên lidarxistin
Wezareta Karên Navxwe di giştînameyê de ji Saziya Perwerdehiya Bilind (YOK) xwest ku dersên “bêteror” werin dayîn. YOKê jî daxwaza wezaretê erê kir û dê li zanîngehan ders, panel, civîn, komcivînên bi navê “bêteror” li dar bixe.
