Enqere – Karkerên Madenê ku ji bo heqdestê xwe 8 roj in di çalakiya gireva birçîbûnê de ne, xwestin bimeşin ber Wezareta Enerjiyê. Karkerên bariyerên polîsan hilweşandine û dest bi meşê kirin. Li ser vê yekê polîsan êrişî karker û girseyê kirin û Pisporê Rêxistinkirinê yê Sendîkaya Maden-Îş a Serbixwe Başaran Aksu û Serokê Sendîkaya Madenê ya Xweser Gokay Çakir binçav kirin.
Karkerên Madenê yên giredayî Sendîqaya Xweser a Karkerên Madenê yên di şîrketa madenê ya bi navê Dorukê de dixebitîn ji bo heqdestê xwe bi dest bixin li Enqereyê dest bi çalakiya greva kirin. Karkerên dest bi çalakiya greva birçîbûnê kirine di roja 8an a çalakiyê de xwestin ber bi Wezareta Enerjiyê ve bimeşin. Parlamenterê DEM Partiyê Ferît Şenyaşar, Serokê Giştî yê TÎPê Erkan Baş, parlamenterên CHPê, partiyên siyasî û endamên sazî û sendîqayên civakî û gelek kesan ji bo piştevaniyê serdana çalakiya karkeran kir.
Karkerên beriya çalakiya meşê demekê dirêj di bin dorpeçe de çalakiya xwe domandin. Karkerên bertek nîşanî dorpêça polîsan dane ji bo heqdestê xwe bi dest bixin cilên xwe ji xwe kirin. Ferît Şenyaşar jî ji bo piştevaniya karkeran cilê xwe ji xwe kir û tev li karkerên nîv tazî bû. Karkeran bi berzkirina dirûşmên, “Serkeftin a karkerên li ber xwe didin e”, “Yekitiya karkeran dê sermayeyê têk bibe” û “Bi berxwedanê em ê bi serbikevin” bertek nîşanî dorpêça polîsan dan.
Karkeran barîkat hilweşandin
Piştî demekê karkeran tevî astengiyê jî xwestin bimeşin ber wezaretê. Li ser vê yekê polîsan karker dorpêç kirin û destûr nedan karkeran. Karkeran di hundirê dorpeçê de û girseya hatibû piştevaniyê jî li pişt barîkatan mane, barîkat û dorpêça polîsan hilweşandin. Demekê dirêj di navbera karker, girsê û polîsan de gengaşê çêbû. Piştî demekê karkeran careke din xwest bimeşin û barîkatên polîsan hilweşandin û belavî nava parkê bûn.
Serokên sendîkayan hatin binçavkirin
Piştî karkeran dorpeç hilweşandin û belavî parke bûn polîsan bi xaza îsotê êrişî karker û girseyê kirin. Polîsên ku bi tund êrişî girseyê kirine, nehiştin ku rojnameger jî kêşanê bikin. Polîsan bi êrişê, girseya ji bo piştevaniyê hatiye kir û ji hundirê parqê derxistin. Bi ser vê yekê karker di parqê de tenê man. Polîsan Pisporê Rêxistinkirinê yê Sendîkaya Maden-Îş a Serbixwe Başaran Aksu Başaran Aksu û Serokê Sendîkaya Madenê ya Xweser Gokay Çakir hatin binçavkirin.
Di bin dorpeçê de çalakiya karkeran didome
Piştî polîsan girsê û karker ji hev cuda kirin, karker careke din dorpeç kirin û nehiştin girsê bikeve nava parqê. Karkerên madenê jî di bin dorpeçê de bi berzkirina dirûşmeyan çalakiya xwe didomînin. Her wiha girseya dixwazê serdana çalakiya karkeran bike ji aliyê polîsan ve tên astengkirin. Girseya ji bo piştgiriyê hatiye li derveyî parqê bi berzkirina dirûşmeyan bertek nişan astengkirina piştgirê didin.
Çalakiya karkeran a di bin dorpêçê de berdewam dike.
