Sêrt – Gundê Omyanisê di salên 1990î de hat valakirin. Şêniyên gund diyar kirin ku dema ji gund koçber bûn ji aliye aboriyê ve gelekî zehmetî kêşan lê dema vegeriyan gundê xwe pirsgirêkên wan ên aboriyê neman.
Gundê Omyanis ê girêdayî navçeya Berwariya Sêrtê di salên 1990î de ji aliyê dewletê ve hate valakirin û 60 malên wê demê li gund dijiyan li gelek bajarên Kurdistan û Tirkiyeyê belav bûn. Yek ji malbatên ku koçber bûne malbata Kulter e. Malbata Kulter piştî ku 25 salan li Şirnexê ma di sala 2015an de vegeriya gundê xwe û vaye 10 salan bi 3 malên din re jiyana xwe li gund berdewam dikin.
‘Dema em li Şirnexê bûn xizaniyek zêde me jiya’
Yek ji ferdên malbatê Kasim Kulter diyar kir ku dema ew koçber bûne gelek xizan bûne û wiha dest bi axaftina xwe kir: “Em di salên 90î de koçber bûn û çûne Şirnexê. Li Şirnexê jiyana me tune bû. Gelek alozî bi serê me hatin û me jiyaneke xizanî derbas kir. Gelek caran em li bendê bûn ku kesên dewlemend zikata xwe bidin me. Me demek dirêj li Şirnexê gavantî kir û wisa debara mala xwe kir. Em bi çend heb sewalan hatin gund, niha bûye keriyek.”
Kulter da zanîn ku dema vegeriyane gundê xwe 5 rojan di kon de mane û axaftixa xwe wiha berdewam kir: “Di sala 2015an de me destûr ji dewletê xwest û em vegeriyan gundê xwe. Destpêkê em hatin, ez 5 rojan di kon de mam û pişt re me dest pê kir û avahiyek ku em têde îdare bikin ava kir. Destpêkê ez çûm gundê Hosyan û min ji gundiyan çend sewal girtin. Pişt re me li sewalên xwe nêrî û niha bûye keriyek.”
‘Ji aliyê aborî ve êdî em ne muhtacî tu kesî ne’
Kulter anî ziman ku ew debara xwe bi hilberînên xwe dikin û wiha pêde çû: “Niha bizin û mihên min bûne 200-300. Ji bilî wê em mirîşk û mêşên hingivîn jî xwedî dikin. Her wiha em bistan û darên fêkiyan diçînin û dema zêde bin em difiroşin. Wekî din penîr, goşt û hingivê ji me zêde dike em difiroşin. Dema gundê me hate valakirin 60 mal di gund de bûn. Niha em 4 mal vegeriyane û êdî ji aliye aborî ve em ne muhtacî tu kesî ne. Hemû tiştên pêwîst em ji axa xwe derdixin û bi hilberînên em difiroşin pêwîstiyên xwe yên din bi dest dixin.”
Kulter herî dawî bal kişand ser talana daristanan û axaftina xwe wiha bi dawî kir: “Cerdevanan ewil dest bi birîna daristanên me kirin. Li derdora gundê me darên bi kêrî wan bên hemû birîn û niha çûne herêmên din daristanan dibirin.”
