Nobeta ku bi pêşengiya Platforma Şiyar be û TJAyê bi dirûşmeya “Pêngava Rabin” ku hefteyeke didome, bi meşê û bi daxuyaniyekê bi dawî bû. Parlamentera DEM Partiyê ya Sêrtê Sabahat Erdogan Saritaş di çalakiyê de axivî û got: “Yên ku dixwazin heqîqeta gelê Kurd tune bike, em ê jî li dijî wan li qadan bin.”
Nobeta li Sêrtê ya bi dirûşmeya “Pêngava Rabin” ku ji aliyê Platforma Şiyar be û Tevgera Jinên Azad (TJA) ve hatibû destpêkirin îro ji ber avahiya DEM Partiyê heta Rêya Guresê meşiyan û piştî meşê daxuyanî hate dayîn. Parlamentera DEM Partiyê ya Sêrtê Sabahat Erdogan Saritaş, rêveber û endamên partiyên siyasî yên bajêr û yên navçeyên wê, Hevşaredarên bajêr û gelek rêveberên saziyên civakî yên Sêrtê tev li meşê û daxuyaniyê bûn. Di çalakiyê de bênavber dirûşmeyên “Li dijî tiryakê mil bi mil”, “ Jin Jiyan Azad”, “ Bajarê xwe ji fihûş û tiryakê rizgar bike” û “Ne tiryakê, xwe girêdayê jiyanê bike” hatin berzkirin û pankartên ku li ser wan “Jin Jiyanê diparêze li dijî tiryak û fihûşê ye” û “Li dijî tiryak û fihûşê em ê jiyana xwe ava bikin” hatibûn nivîsandin hilgirtin.
‘Hişmendiya sed salan hê jî zindî ye’
Parlamenter Sabahat Erdogan Saritaş di daxuyaniyê de axivî û bal kişand ser polîtîkayên ku sed sal in li erdnîgariya Kurdistanê tên meşandin û got: “Bi taybetî sed sale gelê Kurd li hemberê polîtîkayên îmhayê li ser piyaye û herdem berxwedana xwe mezin dikin. Di vê pêvajoyê de jî em dibînin ew hişmendiya sed salan hê jî zindî ye. Erdnîgariya me her tim weke labûratûara şerên qirêj tunekirin û îmhakirinê bi xwe re tîne. Nasname, çand, zimanê me qedexe ye û xwezaya me jî tê talankirin. Îro jî bi hemû tang û topên xwe dîsa jî nikarin gelê Kurd tune bikin. Hemû kolan û taxên me bi kamerayan tên şopandin. Di her çalakiyên me de bi hezaran polîs li dora me kom dibin û her axaftinên me qeyd dikin. Bi destê leşker û polîsan li dijî vê civakê kiryarên gelek qirêj hene. Bi heman awayî li Sêrtê jî heman hişmendî zindî ye. Çawa ku hûn nikarin gelê Kurd tune bikin, hûn ê di nava qirêjê de jî têk biçin. Gelê Kurd çawa ku xwedî li nirx û pêşeroja xwe derdikeve, dê li ciwanên xwe jî derkeve.”
‘Em bi hemû sazî û dezgehên xwe re amade ne’
Sabahat Erdogan Saritaş anî ziman ku rêxistinên wan hemû ji bo ciwanên di nava qirêjiyên fihûş û tiryakê de ne amade ne û wiha domand: “Bila berê xwe nedin wan rûyên qirêj. Yên ku dixwazin heqîqeta gelê Kurd tune bike, em ê jî li dijî wan li qadan bin. Ew heqîqeta ku bi sed salan e dixwazin tune bikin, ew heqîqet îro li vir e. Em bi hemû sazî û dezgehên xwe re amade ne, li dijî vê yekê şiyar in. Em bang li mamosteyên dibistanan, hemû sazî û dezgehên bajarê xwe û li esnafan dikin hêza xwe xurt bikin. Divê em pêşeroja xwe û ciwanên xwe ji vê qirêjê biparêzin, da ku em têkoşîna xwe mezin bikin. Em di bûyera Gulistan Dokû de nas dikin ku çawa hemû saziyên dewletê bi hev re hevkariyê dikin. Ciwan û jinên Kurd dikişinin nava qirêjiyê.”
Çalaki bi çepikan û berzkirina dirûşmeyan bi dawî bû.
