Piştî Civata Giştî ya KNKê gelek siyasetmedaran biryarên hatine dayîn nirxandin û destnîşan kirin ku ji bo parastina destketiyên gelê Kurd divê helwesta neteweyî, konferansa neteweyî û stratejiya hevpar were pêşxistin.
6-7ê Hezîranê li bajarê Venlo yê Hollandayê 24emîn Civata Giştî ya KNKê hat lidarxistin ku du rojan dom kir. Siyasetmedarên Kurd biryarên di civînê de hatine dayîn dinirxînin.
Siyasetmedarên Kurd ên ji ANFê re axivîn, destnîşan kirin ku li hemberî geşedanên li Rojhilata Navîn helwesta neteweyî ya hevpar pêwîst e.
Stratejiya hevpar neçarî ye
Siyasetmedarê Kurd Lezgîn Botan diyar kir ku di van rojên dîrokî de hêzên navneteweyî pozîsyonên nû diyar kirine û wiha got: “Li Rojhilata Navîn û cîhanê guhertinên girîng çêdibin. Hêzên kûrewî li Rojhilata Navîn dewletên otorîter û navendî li ser esasê berjewendiyên xwe polîtîka dimeşînin. Ev polîtîka jî li hemberî gelê Kurd xeteriyên cidî di nava xwe de dihewîne. Ev geşedan ferz dikin ku êdî siyaseta Kurd bibe yek, hemû aktorên siyasî yên li çar parçeyên Kurdistanê û beşên civakî di kongreyeke neteweyî de werin ba hev.”
Ji bo konferansa neteweyî ne dereng e
Siyasetmedar Demîr Çelîk jî destnîşan kir ku divê êdî stratejî û polîtîkayên ku yekitiya neteweyî esas digire were pêşxistin û ev tişt anî ziman: “Îro ne tenê dema axaftina yekitiyê ye, dema avêtina gavên şênber û bicihanîna biryarên ji bo vê yekitiyê ye.”
Misogeriya destkeftiyan yekitiya neteweyî ye
Siyasetmedar Huseyîn Yilmaz jî ragihand ku heta yekitiya Kurdan çênebe tu garantiya destkeftiyên gelê Kurd nîn e û ev nirxandin kir: “Îro em di pêvajoyeke krîtîk de derbas dibin. Rojava di bin xeteriyê de ye, Başûr di bin xeteriyê de ye. Di heman demê de li Bakurê Kurdistanê jî xeterî heye ku pêvajoya ji aliyê Rêberê Gelê Kurd Birêz Abdullah Ocalan ve hatî destpêkirin, were sabotekirin. Lewma ji bo parastina hemû destkeftiyên gelê Kurd, pir girîng e ku Kurd yekitiya xwe ya neteweyî çêbikin. Rojhilata Navîn jinûve şêwe digire û hêzên desthilatdar hewl didin herêmê li gorî berjewendiyên xwe dîzayn bikin. Sekneke Kurdan a bi parçe, tiştek bi Kurdan nade qezenckirin. Divê her kes bi ferq û cudahiyên xwe di nava vê yekitiya neteweyî de cih bigire.”
