OHD, ÎHD û Baroya Rihayê ji bo welatiyên li navçeyên Wêranşar, Pirsûs û Rihayê hatine binçavkirin daxuyanî da û diyar kirin ku li dijî tundiya binçavan de li welatiyan hatiye kirin ew ê serdana lêpirsînê bikin û xwestin yên di bin çavan de demildest bên berdan.
Baroya Rihayê, Komeleya Hiqûqnasên Ji bo Azadiyê (OHD) a Şaxa Rihayê, Komeleya Mafên Mirovan (ÎHD) a Şaxa Rihayê, derbarê welatiyên li Riha û navçeyên wê yên ku ji ber çalakiyên şermezarkirina êrişên çeteyên HTŞ SMO û Tirkiyeyê li ser Rojava hatibûn binçavkirin û îşkence li wan hatiye kirin li Baroya Rihayê daxuyanî dan. Endam û nûnerên OHD, ÎHD û serokê Baroya Rihayê Abdullah Oncel tevlî daxuyaniyê bûn. Metna hevpar a daxuyaniyê ji aliyê hevseroka OHD a Şaxa Rihayê Gul Fehîme Binîcî ve hat xwendin.
Gul Fehîme Binîcî diyar kir ku li navçeyên Wêranşar û Pirsûsê welatiyên xwestine li dijî êrişên ser Rojava çalakiyên demokratîk li dar bixînin bi îşkenceyê hatine binçavkirin û wiha got: “Li Pirsûsê 7 kes, li navenda Rihayê 2 kes û Wêranşar 9 kes hatin binçavkirin. Ew çalakî hiqûqî û demokratîk e. Êrişa tund a polîsan li dijî çalakiyan ne tenê binpêkirina mafan e û baweriya ji pêvajoya aştiyê jî kêm dike. Jji binçavkiriyan yek jê hepsa malê danû û yek jî hat girtin. Welatiyên hatine binçavkirin hemû jî aliyê polîsan ve hatine derbkirin. Di dema binçavkirinan de agahî nedane malbat û parêzeran. Parêzeran bi hewldana xwe tespit kiriye ku gelek kes li TEMa Rihayê û şaxa zarokan a polîsan de tên girtin. Xwarin û vêxwarin nedane kesên li Pirsûsê hatine binçavkirin. Her wiha parêzeran xwestiye xwarinê bibin ew jî hatinê astengkirin. Li Wêranşarê jî dê û bavên pitika 3 mehî bi hev re hatine binçavkirin. Ji dayikê re destûr hatiyê dayin ku tenê 5 seat careke şîr bide pitika xwe. Polîtîkayên Tirkiyeyê li dijî Rojava bandoreke neyînî li ser pêvajoya li Tirkiyeyê hatiye destpêkirin jî dike.”
‘Li hundir û dervê naxwazin Kurd xwedî maf bibin’
Gul Fehîme Bînîcî anî ziman ku li dijî qedexeya xwe pêşendanên walîtiyê ku di navbera 22 û 23yê Çileyê de li tevahî Rihayê hatiye ragihandin ew ê îtîraz bikin û wiha got: “Peywîra dewletê ew e ku li dijî polîsên îşkence li welatiyan kirine lêpirsînê bide destpêkirin. Heke ew polîs neyên cezakirin dê rê li ber sûcên din jî vebike. Ew polîtîka jî bi polîtikayên Tirkiyeyê ên li dijî Rojava re giredayî ye. Li hundir û derve naxwazin Kurd xwedî maf bibin. Li herdu aliyan jî maf û hebûna Kurdan hedef digirin. Weke OHD, ÎHD û Baroya Rihayê em daxwaz dikin ku derbarê polîsên tundî û îşkence li welatiyan kirine lêpirsîn bê destpêkirin û muameleya xirab a di bin çavan de demildest bê rawestandin. Her wiha divê yên di bin çavan de demildest bên berdan. Em ê rewşa kesên hatine binçavkirin bişopînin û derbarê welatiyên rastî tundî û îşkenceyê hatine jî serdana lêpirsînê bikin.”
