Navenda Giştî ya OHDê daxuyanî da û destnîşan kir ku ew piştgiriyê didin banga Abdullah Ocalan û xwest demildest tecrîd rabe û Ocalan bigihîje azadiya xwe ya fizîkî.
Piştî “Banga Aştî û Civaka Demokratîk” a Rêberê PKKê Abdullah Ocalan, li Kurdistan, Tirkiye û cîhanê gelek aliyên siyasî û rêxistinên sivîl û hiqûqê piştevaniyê didin vê bangê. Navenda Giştî ya Komeleya Hiqûqnasên Ji bo Azadiyê (OHD) li avahiya Şaxa OHDa Amedê daxuyanî da.
OHDê bi navê “Ji bo aştî û siyaseta demokratîk pêwîste tecrîd bi dawî bibe û pêwîstiyên hiqûqî bên bi cihanîn” civîna çapemeniyê li dar xist. Hevserokên Giştî yên OHDê Serhat Çakmak û Ekîn Yeter û rêveber û endamên komeleyê tev li civînê bûn.
‘Em piştgiriyê didin banga birêz Ocalan’
Beriya daxuyanî bê xwendin Hevserokê Gişî yê OHDê Serhat Çakmak axivî û bal kişand ser peyama dîrokî ya Abdullah Ocalan. Serhat Çakmak bi bîr xist ku Abdullah Ocalna du roj beriya niha bangek dîrokî kir û got: “Piştî bangê pêvajoya berdana çekan û demokrasiyê dest pê kir. Em jî wek komeleya xwe girîngî didin vê bangê. Komeleya me jî ji roja hatiye avakirin, heta îro parastina mafên mirovan û hiqûqê dike. Yek ji xebatên me yên sereke jî tecrîdkirina li ser birêz Ocalan bû. Divê tecrîd demildest ji ser birêz Ocalan bê rakirin da ku dikaribe bi şert û mercên azad rabe û pêvajoyê bi rê ve bibe. Em jî ji bo vê pêvajoyê amade ne. Em dixwazin gav bên avêtin. Piştre em bi her awayî amade ne.”
Piştre daxûyanî ji aliyê rêvebera OHDê Şevîn Kaya ve hat xwendin.
Daxûyanî bi vî rengî ye:
“Daxuyaniya Abdullah Ocalan a di 27ê Sibata 2025an de ji bo avakirina aştiya demokratîk û veguhertina dîrokî ya li Tirkiyeyê xaleke krîtîk e. Gotinên birêz Abdullah Ocalan ên ‘Bêguman di pratîkê de danîna çekan û hilweşandina PKKê pêwîstî bi naskirina siyaseta demokratîk û aliyê hiqûqî heye’. Ji bo bidawîkirina pevçûnan û li ser esasê aştiyê avakirina siberoja hevpar a gelan bangek dîrokî ye.
Divê tecrîd bi dawî bibe
Ji bo ev bang were bicih were û xurtkirina diyalog û çareseriyên demokratîk, gava herî lezgîn rakirina tecrîda li Îmraliyê ye. Ji bo aştiyeke mayînde, divê demildest polîtîkayên tecrîdê bi dawî bibin. Ji bo ku Abdullah Ocalan dikaribe bi şert û mercên xwe rabe, divê azadiya wî were mîsogerkirin. Di vî warî de prensîbên hiqûqê yên gerdûnî û DMMEyê hene. Divê bi lezgîn biryara ‘mafê hêviyê’ ya der barê Ocalan de ku ev 10 sal in pêk nayê, were bicihanîn.
Mîsogeriya azadiya Ocalan
Tecrîda li ser Ocalan ne tenê binpêkirina mafên takekesî ye, li pêşiya pêşeroja demokratîk a civaka Tirkiyeyê jî asteng e. Polîtîkayên tecrîdê çareseriyên aştiyane asteng dike. Ji bo meşandina pêvajoyên diyalog û muzakereyê weke pêwîstiyekê, pergala civakî ya demokratîk, divê azadiya Ocalan bê mîsogerkirin û rê li ber wî bê vekirin ku weke aktorekî çalak di vê pêvajoya girîng a ku bangawazî kiriye de cih bigire.
Divê rayedar guhd bidin bangê
Weke Komeleya Hiqûqnasên Azadîxwaz, em daxwaz dikin ku li gorî qanûn û mafên mirovan tecrîda Îmraliyê bê rakirin û bi navê sîyaseta demokratîk û avakirina aşitiyê bi awayekî lezgîn rêgezên hiqûqî yên ku mafê hêviyê ferz dike, pêk bînin. Em bang li hemû raya giştî û rayedaran dikin ku guh bidin vê bangê da ku Tirkiye demokratîk bibe û pêvajoya aştiyê pêş bikeve.”
