Neteweyên Yekbûyî (NY) bi daxuyaniyekê balkişand ser rewşa Yemenê û got ku li Yemenê şewba kolerayê bi awayekî metirsîdar belav dibe.
Li Yemenê ji ber şert û mercên şer, zehmetiya peydakirina ava paqij, helwişîna pergala kanalîzyonê, qirêjbûn û têkçûna pergala tenduristiyê, nexweşî û şewb bi awayekî lez belav dibin. Li gorî rapora 8’ê Çileyê ya ji aliyê Ofîsa Koordînasyonê ya Karûbarên Mirovî (OCHA) ya Neteweyên Yekbûyî (NY) ve hatiye weşandin, ji Adara 2024’an û ve vir ve li 23 bajarên Yemenê 339 hezar û 371 pêketinên guman ên kolerayê hatine tespîtkirin û ji ber van nexweşiyan jî 102 kesan jiyana xwe ji dest dane.
Karesata nexweşiya kolerayê
Rapora NYê destnîşan dike ku li gor daneyên tomarkirî rêjeya mirinê ji sedî 0.32 ye û rêjeya enfeksiyona kolerayê ya neteweyî ji sedî 1ê derbas dibe. Rapor pêşketina nexweşiyê ya di vê lezê de pir xetere pênase dike û dibêje: “Heke neye çareserkirin dê bibe sedemeke karesateke mezin.”
Dê zextê li jiyana milyonan bike
Rapor, koleraya li Yemenê yek ji nexweşiya herî berfireh ya li cîhanê pênase dike. Li gor raporêheke tevdîr neyên girtin dê ev nexweşî li ser jiyana bi milyonan mirovan bandor bike. Rapor dibêje belavbûna nexweşiyê ji ber kêmbûna ava paqij a vexwarinê, xizmetên kanalîzyonê yên nebaş, kêmbûna xurekê û xizmetên tenduristiyê yên nebaş, zêde bûye.
Hewildanên tevbîrên nexweşiyê
Her wiha rapor destnîşan dike ku rêxistinên NY’ê û bi taybetî jî UNICEFê, ji bo kêmkirina bandorên şewba kolerayê rêzetevdîr girtine. Hat diyarkirin ku wan ji bo bergirtina nexweşiyê li gelek derdoran kîtên dermankirina îshala akût belav kirine, piştgirî dane 3 hezar û 200 navendên tenduristiyê û ji bo bûyerên krîtîk 15 navendên pispor ava kirine.
