Hûsiyên bi piştevaniya Îranê yên li Yemenê ragihandin ku hêzên Erebistana Siûdî êriş birin ser keştiyeke sivîlan a li nêzî Tengava Bab el-Mendebê û di encamê de 19 kesî jiyana xwe ji dest dan.
Berdevkê Wezareta Tenduristiyê ya Hûsiyan Annes Alaşahi li ser hesabê xwe yê Xê daxuyanî da û diyar kir ku balafirên Siûdî li keştiyekê xistin ku zêdeyî 25 sivîlên ji warê xwe bûn tê de bûn.
Alaşahi anî ziman ku di encama êrişê de 19 sivîlan jiyana xwe ji dest dan, çar kes jî birîndar bûn. Televîzyona Almasirah a ser bi Hûsiyan re jî ragihand ku ji kesên jiyana xwe ji dest dan 8 jê zarok, 6 jî jin bûn.
Hate gotin, keştî ji Ras el-Ara ya li başûrê Yemenê ber bi Haysê ve diçû. Alaşahi got, êrişa li dijî sivîlan û mirovên ji cih û warê xwe bûne “sûcê şer e” û binpêkirineke eşkere ya hiqûqa mirovî û mafên mirovan e.
Ajansa Nûçeyan a Haba û Ensarullah a nêzî Hûsiyan jî ragihand ku roja Înê balafirên Siûdî êriş birin ser paytext Sanayê. Ensarullah diyar kir ku bajarê Taizê yê li başûrrojavayê welêt jî bû hedef.
Erebîstana Siûdî: Fuze û drone hatin astengkirin
Berdevkê koalîsyona bi serkêşiya Erebistana Siûdî Turki el-Maliki jî sibeha Înê daxuyaniyek da û diyar kir ku fuzeyeke balîstîk a ji başûrê welêt ji aliyê Hûsiyan ve hate avêtin ji aliyê sîstemên parastina hewayê ve hate astengkirin û îmhakirin. El-Maliki di daxuyaniya beriya wê de jî gotibû, li başûrê welêt 2 drone hatin astengkirin.
Yekîneyên Parastina Sivîl a Erebistana Siûdî ji bo bajarên Cizan, Abha û Hamis Muşayt ên li başûrrojavayê welêt ji ber “xeteriya gengaz” hişyariyên demkî weşand.












