Hevserokê Desteya Kar û Barê Civakî û Kedkaran Ehmed Xoce diyar kir ku ji destpêkirina pêlên êrişên li ser Bakur û Rojhilatê Sûriyeyê heta niha nêzî 200 hezar kesên ji zêdetirî 70 deverên cuda hatine navenda Kobaniyê.
Ajnasa Nûçeyan a Firatê têkildarî koçberiya Kobanê bi Hevserokê Desteya Kar û Barê Civakî û Kedkaran Ehmed Xoce axivî. Ehmed Xoce, diyar kir ku Kobanê ji çar aliyan ve hatiye dorpêçkirin û got: “Piştî pêlên êrîşan ên li ser bajarên Bakur û Rojhilatê Sûriyeyê, pêlên mezin yên koçberiyê berê xwe dan bajarê Kobanê. Ji destpêka pêlên êrişan yên li ser taxên Şêxmeqsûd û Eşrefiyê, gelên ji her du taxan û ji hemû deverên din yên ku çete xwe lê digirin gel neçar ma ku berê xwe bide bajarê Kobanê. Niha ew koçber di nava rewşeke krîtîk de dijîn. Ew li dibistan, zanîngeh, mizgeft, eywanên şahiyan, akademî û gelek cihên din hatine bicihkirin. Di her maleke Kobanî de çar û pênc malbat tevlî nava malê bûne.”
‘Kobanî hêj dorpêçkirî ye’
Ehmed Xoce piştre bal kişand ser rewşa koçberan û got: “Li bajarê Kobanê bi sed hezaran kesî cih girtiye. Ruxmî ku berf, baran û rewşa hewayê ya sar jî, gel bi rengan debara jiyana xwe dike. Em niha hewl didin ku hejmara koçberên li vir diyar bikin, lê belê a niha li gorî ku tê texmînkirin 200 hezar kesî derbas kiriye. A niha bajarê Kobanê dorpêçkirî ye, ji ber vê yekê jî ev koçber jî ji hin tiştan mehrûm dimînin. Hin pêdivî bi rengekî qaçax derbas dibin, lê belê dîsa jî bi du qat û sê qatan zêdetir tên firotin.”
‘Mal û milkê gel hatiye talankirin’
Ehmed Xoce, di dewama axaftina xwe de diyar kir ku mal û milkên koçberan hatine talankirin û got: “Mal û milkên van koçberan hatine talan û wêrankirin, mal û milkên wan tên dizîn û dûra malên wan dişewitînin. Hin belge di destê me de hene ku vê yekê teqez dikin. Ruxmî ku gelek caran şandeyên me berê xwe dan parêzgeha Helebê û bi taybetî jî ji bo ku koçber vegerin mal û milkên xwe, lê belê ew yek heta niha pêk nehatiye. Berovajî wê ew hîna xwe di wan mal û milkên wan gelan de xwe bi cîh dikin, xerab dikin, talan dikin û dişewitînin.”
Ehmed Xoce, di dawiya axaftina xwe de wiha got: “Eger rewş wiha dewam bike û dorpêç wiha dewam bike wê bi xwe re kareseteke mirovî bîne. Bi taybetî jî em weke Desteya Kar û Barê Civakî û Kedkaran em ê heta dawiyê xwedî li van koçberên xwe derkevin.”
