Parlamentera DEM Partiyê ya Şirnexê Newroz Uysal Aslanê derbarê îxraçkirina Hevserokê Şaxa Egîtîm-Senê ya Şirnexê Adnan Şenbayram, rêveberên Egîtîm-Sena Şirnexê Mesût Aslan, Nîzam Kaplan û rêveberê Şaxa SESê ya Şirnexê Abdulkadîr Oruker de pêşniyazpirsek pêşkeşî Meclisê kir.
Hevserokê Şaxa Egitîm-Senê ya Şirnexê Adnan Şenbayram, rêveberên Egitîm-Sena Şirnexê Mesût Aslan, Nîzam Kaplan û rêveberê Şaxa SESê ya Şirnexê Abdulkadîr Oruker bi hinceta tev li xwepêşandanên êrişên li dijî Rojava bûbûn hatibûn îxraçkirin. Parlamentera DEM Partiyê ya Şirnexê Newroz Uysal Aslanê, tekildarî îxraçkirina kedkarên cemaweriyê pêşniyazpirsek pêşkeşî Meclisê kir.
Newroz Uysal Aslanê diyar kir ku mufetîşên Wezareta Perwerdehiyê derbarê kedkarên cemaweriyê yên hatine îxraçkirin de pirsên li dijî mafê demokratik yên sendîkayê pirs kirine û ev yek jî nişan dide ku rêveberiya cemaweriyê ne li gorî hiqûqê li gorî siyasetê tevdigere. Newroz Uysal Aslanê da zanîn ku derbarê MYKa Egîtîm-Senê Sîmge Yardim û Hevserokê Şaxa Egîtîm-Sena Şirnexê Adnan Şenbayram de ji ber daxuyaniyên li dijî tacîza Burak Ercan a li 48 zarokan kiribû jî doz hatiyê vekirin û anî ziman ku bi vê yekê re şûna kesên tacîz kirine bên darizandin kesên li dijî vê yekê daxuyanî dane tên darizandin.
Newroz Uysal Aslan di pêşniyazpirsê de xwest hemû aliyên îxraçkirina kedkarên cameweriyê were lêkolînkirin û ji bo mafê sendîka, mafê xwe îfadekirinê û mafê xwepêşandanên aştiyanê sepanên zextê bidawî bibin û ji bo vê jî çi tedbir hewce bin bên diyar kirin û ji aliyê meclise vê bê lêkolînkirin.
Her wiha Newroz Uysal Aslanê li ser tacîza li dijî zarokan a li Şirnexê ji bo Serokatiya Meclisê bersiv bide ev pirs kirin:
” * Li Şirnexê di salên 2013an û 2026an de derbarê îstîsmara zayendî, êriş û tacîza zayendî ya li dijî zarokan çend lêpirsîn hatine destpêkirin û ji bo fihuşê zext li çend zarokan hatiye kirin?
* Ji van lêpirsînan çend bi dozê encam girtine, çend ji wan hatine betalkirin û çend hîn jî didomin?
* Li Şirnexê, ji sala 2013an vir ve, hejmara dozên îstismara zarokan û tundiya zayendî ya ku mamoste, karmendên bicîhanîna qanûnê, leşker, karmendên giştî, an kesên bi saziyên giştî ve girêdayî ne çend e?
* Di 5 salên dawî de, derbarê îstismara zarokan, êrîşa zayendî, tacîza zayendî, kuştina jinan û tundiya zayendî ya li dijî jinan li seranserê Tirkiyeyê çend lêpirsîn hatine destpêkirin û çend dozên giştî hatine vekirin? Gelo ev daneyên di destê wê de ne dê ji Serdozgeriya ku li doza Sîmge Yardim û Adnan Şenbayram dinêrê re bê şandin an na?
* Ji aliyê Wezareta wê ve dê derbarê mamoste, rojnameger û rêxistinên jinan ku van sûcên îstîsmarê derdixînin holê û ji ber vê yekê zext li wan tê kirin de tu xebat tê kirin an na?
* Li Şirnexê di dosyayên îstîsmarê yên ku navê xebatkarên dewletê tê de derbas dibin de polîtikayên necezakirinê tên sepandin. Kedkarên cemaweriyê ku vê yekê derdixînin holê tên darizandin. Wezareta wê ji ber vê rewşê dê gavên çawa biaveje?
