Serokwezîrê Îsraîlê Binyamîn Netanyahu got ku plana Amerîkayê nehatiye qebûlkirin û ragihand ku hikûmeta wî li ser hin xalên planê guherîn dixwaze. Tel Avîv dibêje ku şertên heyî ji bo ewlehiya Îsraîlê têrê nakin.
Serokwezîrê Îsraîlê Binyamîn Netanyahu ragihand ku hikûmeta wî plana ku ji aliyê Serokê Amerîkayê Donald Trump ve ji bo bidawîkirina şerê li Xezeyê hatibû pêşkêşkirin qebûl nekiriye. Wî di peyameke vîdeoyî de got ku reşnivîsa planê gihîştiye destê hikûmetê, lê bi awayê ku hatiye amadekirin ji aliyê Îsraîlê ve nehatiye pejirandin.
Netanyahû wiha dibêje; “Reşnivîsek ji me re hat, lê me ew qebûl nekir. Ew ne pêşniyara me ye.” Netanyahu her wiha diyar kir ku Tel Avîv ji bo hin beşên planê guherîn pêşniyar kiriye û nîqaşên li ser hûrgiliyên wê hîn jî didomin.
Trump berê daxuyandibû ku ji bo bidawîkirina şerê Xezeyê çarçoveyek hatiye amadekirin û gotibû ku Hamas plana agirbestê qebûl kiriye. Li gorî daxuyaniyên wî, ev plan rê li ber bêçekkirina Hamasê û vekişîna hêzên Îsraîlê ji Xezeyê vedike. Lê daxuyaniya Netanyahû nîşan dide ku di navbera aliyan de hîn jî li ser hin mijarên bingehîn lihevhatin çênebûye.
Îsraîl şertên xwe pêşkêş kir
Yek ji mijarên herî girîng şertên vekişîna artêşa Îsraîlê ji Xezeyê ye. Li gorî agahiyên belavbûyî, aliyê Amerîkayê garantî dabû ku vekişîna leşkeran tenê piştî bêçekkirina tevahî ya Hamasê dê pêk were. Lê hikûmeta Îsraîlê vê garantiyê têra xwe nedît û got şertên heyî ji bo ewlehiya welêt ne bes in.
Her wiha di daxuyaniya Serokwezîriyê de hat gotin ku Hamas hîn jî dikare kapasîteya xwe ya leşkerî biparêze û amadekariya êrîşên nû bike. Ji ber vê yekê, Tel Avîv dibêje ku şertên pêşniyarkirî ji bo vekişîna leşkeran nikarin ewlehiya Îsraîlê misoger bikin.
Li hundirê hikûmeta Îsraîlê jî li ser planê nerazîbûn hene. Ji ber vê yekê, her çend hewldanên dîplomatîk berdewam bin jî, siberoja şerê Xezeyê hîn jî ne zelal e.
