Pisporê zanyariyên siyasî û têkiliyên navneteweyî Prof. Dr. Naîf Bêzwan derbarê êrîşên li ser taxên Şêxmeqsûd û Eşrefiyeyê diyar kir ku li hemberî komkujî û koçberkirina Kurdan, divê Kurd xwedî siyaseteke hevpar bin.
Hezên hikumeta demkî ya Şamê û komên çekdar ên giredayî Tirkiyeyê ji 5ê Çileyê û vir ve bi çekên giran êrişî taxên Şêxmeqsûd û Eşrefiyeyê yên Helebê dikin. Komên çekdar li dijî welatiyên sivîl, jin û zarok, mizgeft û nexweşxaneyan bi awayekî hovane êrişên xwe didomînin. Hezên ewlehiyê û şeniyên taxan li dijî êrişan, xwe diparêzin û nahêlin komên çekdar bikevin nava taxên wan. Herçiqas ji aliyê medyaya Tirkiye û hikumeta demkî ya Şamê ve bê gotin ku welatiyên taxê ji taxê derdikevin jî, Meclîsa Taxên Eşrefiyê û Şêxmeqsûd bi daxuyaniyan radighînin ku ew li dijî êrişan li ber xwe didin û dev ji taxên xwe bernadin.
Di vê çarçoveyê de pisporê zanyariyên siyasî û têkiliyên navneteweyî Prof. Dr. Naîf Bezwan ji Ajansa Welat re rewşa dawî ya geşedanan nirxand.
‘Ev êrişên jenosîdî ne’
Naîf Bêzwan destnîşan kir ku ev şereke qirêj û total e û got: “Îro li Helebê li hemberî Kurdan û li niştecihên din bi destê rejîma Colanî û alîgiriya Tirkiyeyê ya siyasî, leşkerî û dîplomatîk êrîşên jenosîdî ango komkujî û koçberî hene. Ev şereke total e, ji ber ku êrîş li hember sivîlan tê kirin, gel tê koçberkirin, qirkirina siyasî tê armanckirin û şereke derûnî tê meşandin.”
‘Armanc avakirina rêjîmeke dîktatoryal e’
Naîf Bêzwan da zanîn ku bi van êrîşan li dijî Rojavayê Kurdistanê û HSDê rewşeke nû derket holê û got: “Ev rewş, rewşeke bi metirsî ye û bêguman gelek metirsiyan jî dihewîne. Li ser navê ‘Yekîtiya Sûriyeyê’ ji aliyê rejîma Colanî û aligirên wî ve pêkhateyên Sûriyeyê yek bi yek têne qirkirin, bingeh û mercên pêkvejiyanê têne rûxandin. Lewma jî armanca van êrîşên hovane, li Rojavayê Kurdistanê û li tevahiya Sûriyeyê avakirina rejîmeke dîktatorî û mêtingerî ye. Bi navê yekîtiya Sûriyeyê, dixwazin li ser Rojavayê Kurdistanê mêtingeriyê pêş ve bixin. Bi vê yekîtiyê tişta ku tê xwestin kolonyalîzm û dagirkerî ye, ne tişteke din e.”
Di berdewama axaftina xwe de Naîf Bêzwan got ev êrîş wekî mîladekê ye û wiha pê de çû: “Piştî komkujî û koçberkirina Helebê, li Sûriyeyê mirov dikare bibêje ku beriya êrîşa Helebê û piştî êrîşa Helebê heye. Ji vir û pê de wê diyar bibe ku Sûriyeyê wê ber bi çi ve bimeşe.”
‘Dewleta Tirkiyeyê dixwaze rola Îranê bi dest bixe’
Naîf Bêzwan got ku Tirkiye, di vê dema ku rejîma Îranê ketiye nava pêvajoya rûxandinê de Tirkiye rewşa Îranê wekî fersendekê ji xwe re dibîne. Naîf Bêzwan da zanîn ku Tirkiye dixwaze rola ku rejîma Îran li Sûriyeyê dilîst, bi dest bixe û heman rolê li Sûriyeyê jî pêk bîne û axaftina xwe wiha domand: “Pêwîst e ku aktorên siyasî yên Kurd, li çar perçeyên Kurdistanê bi stratejiyeke hevpar û siyasete hevgirtî bimeşînin û gavên nû bêne avêtin. Ne gavên sembolîk gavên nû. Derbarê van gavên nû de jî divê li her çar perçeyên Kurdistanê û li Dîasporayê gel mobîlîze bikin. Stratejiyeke hevpar bê diyar kirin wê demê mobîlîzasyon û tevgerandina civaka Kurdistanê jî wê hêsan bibe û civaka Kurdistanê jî niha ji vê re gelekî amade ye.”
Di dawiya axaftina xwe de Naif Bêzwan bal kişand ser metirsiya komkujiyê û wiha derbirî: “Em di asteke wisa de ne ku wextê me nema ye. Ji bo Heleb nebe Helebçeyeke duyem, pêwîst e li hemberî komkujî û koçberkirina Kurdan, divê Kurd xwedî siyaseteke hevpar bin û bi awayeke girseyî li her derî dengê xwe bilind bikin. Çarenûs û pêşeroja Kurdan niha li Helebê tê nivîsandin. Divê mirov bi vî awayî nêzî Helebê bibe.”
