Dayikên Şemiyê di çalakiya 1062an de, li eqûbeta Murat Aslan pirsîn û destnîşan kirin ku kesên ew binçav kirin hîn jî nehatine darizandin û gotin: “Kesên ku Murat Aslan revandin, îşkence li wî kirin û cenazeyê wî winda kirin, lê hîn nehatine darizandin.”
Dayikên/mirovên Şemiyê di hefteya 1062emîn de çalakiya xwe ya li Qada Galatasarayê berdewam kirin. Dayik dîsa li qadê kom bûn wêneyên xizmên xwe yên winda û qurnefîl qirtin dest xwe. Gelek parêzvanên mafên mirovan jî beşdarî çalakiyê bûn. Endama Komîsyona Windayan Sebla Arcan, daxuyaniya da. Sebla Arcan diyar kir ku Dayikên Şemiyê careke din daxwazên xwe yên ji bo edaletê tînin ziman û got: “Her bêdengî, her înkar, her biryara demdirêjiyê careke din rastî û edalet veşartiye. Li dijî vê bêdengiyê, em her hefte bi heman biryardariyê daxwaza xwe ya rastî û edaletê tînin ziman. Em di hefteya 1062an de ji bo eqûbeta Murat Aslan bipirsin li vir in. Li gorî vegotinên şahidan, di 10ê Hezîrana 1994an de, Murat Aslan ê 25 salî dema ku bi du hevalên xwe re li Yenîşehira Amedê dimeşiya, ji hêla çar kesên çekdar ên ku xwe wekî polîs nîşan dan, bi Toroseke Spî hate revandin. Malbata wî ya ku serî li hemû saziyên dewletê da careke din agahî jê negirt û hemû serlêdan bê encam man.”
Sebla Arcan, diyar kir ku ew ê dev ji lêgerîna xwe ya edaletê bernedin û wiha axivî: “Kesên ku Murat Aslan revandin, di bin îşkenceyê de ew lêpirsîn kirin, înfaz kirin û cenazeyê wî winda kirin hatine eşkerekirin. Lê tu ji van nehatinin darizandin. Em di hefteya 1062an de, careke din bang li rayedarên dewletê yên pêwendîdar dikin ku dawî li bêcezatiya 31 salan a di doza Murat Aslan de bînin û lêpirsîn û darizandinek bi bandor bikin. Em ê heta dawî daxwaza edalet bînin ziman.”
Banga ji bo edaletê
Piştî daxuyaniya çapemeniyê, xwişka Murat Aslan, Fatma Aslan diyar kir ku ew ê têkoşîna xwe ya ji bo edaletê bê navber bidomînin.
Piştî ku qurnefîl li Qada Galatasarayê hatin danîn, çalakî bi dawî bû.
