Dayikên Şemiyê di hefteya 1124emîn de li kujerên Mecît Baskin ê ku di sala 1993yan de hatibû binçavkirin û kuştin pirsîn û xwestin berpirsiyar hesab bidin.
Dayik/Mirovên Şemiyê bi daxwaza “Bila windakirî werin dîtin, kujer bên darizandin” di hefteya 1124emîn de li Qada Galatasarayê ya Stenbolê çalakiya xwe ya heftane li dar xist. Dayikên Şemiyê, endam û rêveberên ÎHDa Stenbolê, Dayikên Aştiyê û gelek parêzvanên mafên mirovan tev li çalakiyê bûn. Di çalakiyê de wêneyên windakiriyan hatin hilgirtin. Di çalakiya vê hefteyê de kujerên Mecît Baskin ê ku di sala 1993yan de li Enqereyê hatibû binçavkirin û kuştin pirsîn.
Metna daxuyaniyê ji aliyê Mirova Şemiyê Sebla Arcan ve hate xwendin.
‘Binçavkirin nehat qebûlkirin’
Sebla Arcan anî ziman ku îro ew dosyeya Mecît Baskin parve dikin û wiha got: “Dosyeya Mecît Baskin polîtîkayên bêcezahiştinê eşkere dike. Çiqas delîl û îtîraf hebin jî dosye pêş neket. Mecît Baskin 42 salî û bavê 3 zarokan bû. Di 30yê Îlona 1993yan de li Enqereyê ji aliyê polîsan ve hate binçavkirin. Lê binçavkirin nehate qebûlkirin. Piştî 3 rojan di 3yê Cotmehê de cenazeyê wî li navçeya Golbaşiyê hate dîtin. Bi çekê hatibû kuştin. Malbat ji bo rastiyê derxe holê bi salan têkoşiya. Lê lêpirsîn bi awayekî xurt nehat birêvebirin. Piştî 18 salan polîsê berê Ayhan Çarkin ê îtirafkar diyar kir ku Mecît Baskin bi daxwaza Îbrahîm Şahîn ve ji aliyê polîs Ziya Bandirmalioglû û Ayhan Akça ve hate kuştin. Di sala 2014an de Dadgeha Cezaya Giran a 12emîn a Enqereyê derbarê Mehmet Agir, İbrahim Şahîn û Korkût Eken ji di nav de li 19 kesan doz vekir. Lê tevî îtîrafiyan jî di sala 2019an de dadgehê ji bo hemû bersûcan biryara beraetê da. Bi îtîraza malbatê biryar hate xirakirin lê di sala 2024an de dîsa biryara beraetê hate dayîn. Em dibêjin êdî bes e. Bila dawî li polîtîkayên bêcazehiştinê were anîn.”
‘Em dev ji vê dozê bernadin’
Paşê keça Mecît Baskin, Melek Baskin axivî. Melek Baskin diyar kir ku 50 sal jî derbas bibe ew ê têbikoşin û got: “Heta ku heqîqet derve holê em ê têbikoşin û edaletê bixwazin. Li nava Enqereyê bavê min hate binçavkirin. Em dev ji vê dozê bernadin.”
Çalakî bi danîna qerenfîlan li Qada Galatasarayê bi dawî bû.
