Meclisa Giştî ya Taxên Şêxmeqsûd û Eşrefiyê daxuyand ku êrîşa duh a komên çekdar ên girêdayî hikûmeta demkî “ji berê ve hatibû plankirin” û got divê komên êrîşkar hesab bidin.
Meclisa Giştî ya Taxên Şêxmeqsûd û Eşrefiyê têkildarî êrîşa duh a komên girêdayî Wezareta Parastinê ya hikûmeta demkî ya Sûriyeyê li dijî taxên Şêxmeqsûd û Eşrefiyê, daxuyanî da.
Rêveberê meclisê Mistefa Mihemed li Qada Şehîdan a taxa Şêxmeqsûdê daxuyanî xwend.
Di daxuyaniyê de hat diyarkirin ku êrîşa li dijî taxên Şêxmeqsûd, Eşrefiyê û Benîzêd berdewama êrîşa 6ê cotmehê û dorpêça ji 25ê îlonê ve bû.
Di berdewama daxuyaniyê de hat destnîşankirin ku ev êriş berê plankirî û amadekirî bû, berî wê kehrebe û înternet hat qutkirin, hêzên “Ewlekariya Giştî” ji rêbendên kontrolê yên hevbeş vekişîn. Vekişandina hêzên hikûmetê ji ser bendan di dîmenan de hatiye belgekirin. Ev êriş hemwextî serdana şandeya Tirkiyeyê ji Şamê re pêk hat, armanca wan ew bû ku peymana 10ˊê Adarê têk bibin û biryara Sûriyeyiyan zeft bikin.
Di daxuyaniyê de hat diyarkirin ku di êrişê tevahî cureyên çekên giran û navîn ji tank û obîsan hatin bikaranîn. Ev hemû çek li dijî gelê sivîlan bi awayekî bêserûber dihatin bikaranîn. Di encamê de jinek şehîd bûn û 19 kes jî birîndar bûn.
Meclisê di berdewama daxuyaniyê de got ku ew pabendî peymanên hatine îmzekirin in û dev ji parastina şêniyên herdu taxan û têkbirina hewldanên şikandina îradeya wan bernadin û bang li civata navneteweyî û hemû rêxistinên hiqûqî û mirovî kir ku azadî û rûmeta mirovan biparêzin.
Di daxuyaniyê de hikûmeta demkî, bi taybetî parêzgerê Helebê li hemberî êrîşan û dorpêça li ser taxan wekî berpirs hat dîtin û hat gotin divê komên êrîşkar hesab bidin.
Di dawiya daxuyaniyê de ew bi jiyana hevbeş a bi salane bawer in û bang dikin ku li hember van êrîşên bi armanca derxistina fitneyan bisekinin.
