Êlih – Bi pêşengiya MEBYA-DERa Êlihê bi girseyî serdana şîna gerîlayê Tevgera Azadiyê Rênas Adar (Mazlûm Tûnç) ê ku di 27ê Cotmeha 2020an de li Çiyayê Garê jiyana xwe ji dest dabû hate kirin.
Bi pêşengiya Komeleya Yekîtî Çand, Piştevanî û Alîkariyê ya bi Malbatên ku di Dergûşa Şaristaniyê de Xizmên Xwe Winda Kirine re (MEBYA-DER) ya Êlihê de bi girseyî serdana şîna gerîlayê PKKê Rênas Adar (Mazlûm Tûnç) ê di 27ê Cotmeha 2020an de li Çiyayê Garê jiyana xwe ji dest dabû hat kirin. Rêveber û endamên partiyên siyasî yên bajêr, TJA, Dayîkên Aştiyê, Saziya Ziman û gelek nunerên saziyên sivîl ên civakî serdana li Mala Şînê ya Taxa Beldeyê ya Êlihê serdana şînê kirin.
Girse ji bo kesên ku di têkoşîna azadiya Kurdistanê de jiyana xwe ji dest dane deqeyek rêz girt û piştî rêzgirtinê dirûşma “Şehîd namirin” berz kir.
‘Em bi wan serbilind in’
Endamê MEBYA-DERa Êlihê Şafî Aratemûr li ser navê saziyê axivî û got: “Heval Rênas Adar lehengekî gelê Kurd e. Ew jî weke hevalên me Mazlûm Dogan, Kemal Pîr, Alî Çîçek û Ferhat Kûrtay, pişta xwe da hevalên xwe û tev li nav karwanên şehîdan bû. Li Çiyayê Kurdistanê ji bo doza gelê Kurd têkoşiya. Ji ber vê yekê şehîd rûmeta gelê me ne. Em bi wan ser bilind in. Wan me anî vê astê. Bi saya wan em ketine kategoriya mirovan. Berê navê zimanê Kurdî tune bû, lê îro em bi hêsanî zimanê xwe diaxivin. Şehîd namirin.”
Bavê Rênas Adar, Hamît Tûnç jî bi xêr hatina mêvanan kir û got: “Tenê dozeke wan hebû, ew jî axa wan, welatê wan û têkoşîna wan bû. Daxwaza me ew e ku em mîrateya wan a bigirin, bimeşînin û bi ser bixin. Şehîd namirin.”
