Amed – Burhan Yildirimê ku di dema şerê Kobanê de berdevkê Mala Gel bû diyar kir ku gel bi jiyanek komunal xwedî li berxwedana Kobanê derket û got: “Me sînoran rakirin.”
DAIŞê di 14ê Îlona 2014an de êrişî Kobanê kir. Piştî êrişa DAIŞê şerê giran dest pê kir. Li seranserî cîhanê gel rabû ser pêya û xwedî li Kobanê derket. Gelê Kobanê ji ber şer û êrişên giran neçar ma ku derbasî bajarên bakurê Kurdistanê bibin. Bi hezaran kes li Amedê bicih bûn. Gelê Amedê, saziyên civakî û partiyên siyasî alîkarî kom kirin û li xelkê Kobanê belav kirin. Yek jî wan saziyan jî Malên Gel bûn. Berdevkê Mala Gel a Taxa Medya ya navçeya Peyasa Amedê Burhan Yildirim têkildarî xwedîderketina li Kobanê axivî.
‘Me ji bo Kobanê sê mehan nobet girt’
Burhan Yildirim diyar kir ku dema şerê Kobanê dest pê kir ew berdevkê Mala Gel ya Taxa Medya ya Peyasê bû û wiha axivî: “Dema şerê Kobanê dest pê kir em çûn li ser sînor û me dest bi çalakiya nobedê kir. 3 mehan em li wir man. Ji Stenbolê heta tevahî bajarên Kurdistanê gel herikîbûn sînorê Kobanê. Dema me bihîst ku bajarê Kobanê ketiye tengasiyê û piştgirî hewce ye, em çûn ser sînor û me têlên sînor rakir. Paşê bi hezaran kes derbasî Kobanê bû. Leşkeran êrişî me kir lê dîsa jî me sînor derbas kir. Em çûn Mala Gel ya Kobanê, me alîkarî gelê li wir kir. Paşê em vegeriyan lê gelek kes li wir man. Tev li berxwedana Kobanê bûn.”
‘Tiştê li wir pêk hat divê ji bo pêşeroja me bibe mînak’
Burhan Yildirim da zanîn ku dema gelê Kobanê hat Rihayê, gel çi ji destê wan hat kirin û her tiştên xwe parve kirin û got: “Wê demê zêde amadekariya me tune bû. Bi alîkariya gel, sazî û partiyê me alîkariyan belav kir. Me 3 gundan amade kiribû gelê me yê hat, me wan li wir bicih kir. Nêzî 3 mehan em li wir man û me alîkarî belav kir. Bi alîkariya gelê welatparêz me aşxane ava kir û me xwarin belav kir. Tiştê li wir pêk hat divê ji bo pêşeroja me bibe mînak. Wekî birêz Abdullah Ocalan got divê em xwe bi rêxistin bikin û ji her tiştî re amade bin.”
‘Gel bi ruhê seferberiyê xwedî derket’
Burhan Yildirim destnîşan kir ku wan ji bo kesên hatin taxê komîsyonek ava kiribû û ev komîsyon ji bo xelkê Kobanê dixebitî û wiha got: “Xelkê me yê taxê her tiştî dişandin û me kom dikir. Xwarin, alavê jiyanê hatin berhevkirin. Gelê me ji bo Kobanê bi ruhek û jiyanek komunal tevgeriya û xwedî derket.”
‘Bi saya berxwedanê Kobanê rizgar bû’
Burhan Yildirim bi bîr xist ku piştî wan bihîst rewşa Kobanê nebaş e ew ji bo Kobanê daketin qadan û axaftina xwe wiha bi dawî kir: “Çalakiyên me li seranserî Amedê 4 rojan bênavber berdewam kirin. Serhildanekî gelek mezin pêk hat. Bi saya berxwedana gelê Kurd û dostên wan Kobanê rizgar bû. Gelek ciwan xwîna xwe rijandin. Divê em wan ji bîr nekin. Piştî Kobanê azad bû ew kesên li vir jî vegeriyan Kobanê. Me bi komî wan dişand Kobanê. Îro jî ji bo jiyanekî komunal û demokratîk berxwedana me didome.”
