Fermandarê Giştî yê HSDê Mazlum Ebdî, bi rêya Online beşdarî “Konferansa Neteweyî ya Ciwanên Rojavayî” bû û got: “Li Sûriyeyê 14 sal şer heye êdî bes e. Em êdî şer naxwazin. Lê em ê gelê xwe biparêzin.”
Ciwanên Rojavayî li Ewropayê “Konferansa Neteweyî ya Ciwanên Rojavayî” pêk anîn. Fermandarê Giştî yê Hêzên Sûriyeya Demokratîk (HSD) Mazlum Ebdî, peyamek bi dîmen ji konferansê re şand.
Mazlûm Ebdî anî ziman ku niha li Bakur û Rojhilatê Sûriyeyê agirbest heye û wiha got: “Dibe ku ev agirbest xera bibe. Li Sûriyeyê 14 sal in şer heye. Ev şer ji bo Sûriyeyê êdî bes e. Dibe ku ev agirbest bê xerakirin. Lê em şer naxwazin. Em hevî dikin ku şer çênebe. Lê em her dem amade ne ku saziyên xwe û gelê xwe biparêzin. Em hêvî dikin ku hevdîtinên ji bo aştiyê serkeftî bi encam bibin. Em hevî dikin ku ev şer bi dawî bibe. Çareseriya ji bo siberojê pergala demokratîk e. Divê êdî pergala demokratîk, pir reng û dengî bê avakirin. Divê hemû civak, bawerî, ziman û çandên cuda xwe di nava vê pergalê de bibînin û xwedî vîn bin. Sûriye dê êdî nebe Sûriyeya beriya 2011an. Di 10ê Adarê de di navbera rêveberiya HTŞê û HSDê de peyman hatiye îmzekirin. Di vê peymanê de entegrasyona HSDê ya di nava artêşa Sûriyeyê de guncav hatiye dîtin. Ji bo ev peyman têkeve meriyetê em ê xebatê bikin.”
Mazlum Ebdî da zanîn ku di 13ê Tîrmehê de ew û Nûnerê Taybet ê DYAyê yê li Sûriyêyê Sefîr Barrack, û Serokê rêveberiya HTŞê Ahmed Şara, li Şamê civîn pêk anîne û wiha bi dawî kir: “Ji bo ev peymana 10ê Adarê têkeve meriyetê hewldanên me didomin. Lê ji ber hin hevdîtinên din ên derveyî me astengî derdikevin. Rêveberiya HTŞê di serî de hevdîtina ku dihat plankirin li Parîsê pêk bê û hemû hevdîtinên bi rêveberiya Rojava re rawestandine.”
