Şirnex- Endamê OHDê Parêzer Rojger Ant derbarê mafê hêviyê de got ku biryara ji bo Rêberê Gelê Kurd Abdullah Ocalan hatiye dayîn ne mijara bazarê ye û divê Tirkiye demildest Mafê Hêviyê nas bike.
Parêzerên Rêberê Gelê Kurd Abdullah Ocalan di 2003yan de ji bo mafê hêviyê serî li Dadgeha Mafên Mirovan a Ewrûpayê (DMME) dabun. Piştî serlêdanê di 18ê adara 2014an de DMMEyê biryar da û xwest Tirkiye mafê hêviyê bide Rêberê Gelê Kurd Abdullah Ocalan. DMMEyê Tirkiye di vê serlêdanê de mehkûm kiribû. Di ser vê biryarê re 11 sal derbas bûne û Tirkiyeyê heya niha ev biryar nas nekiriye.
Endamê Komeleya Hiqûqnasên ji bo Azadiyê (OHD) û Rêveberê DEM Partiyê yê Cizîrê Parêzer Rojger Nûh Ant derbarê biryara mafê hêviyê ku ketiye rojeva Komîteya Wezîrên Konseya Ewrûpayê de got ku divê konsey biryara di navbera 15-17 îlonê de bide baş bişopîne û hewceye Tirkiye jî demildest van biryaran pêk bîne.
Ev ne mijara nîqaşê ye ji ber ku Tirkiye hatiye mehkûmkirin
Rojger Ant diyar kir piştî banga Rêberê Gelê Kurd Abdullah Ocalan a 25 sibatê mafê hêviyê ket rojeva raya giştî û axaftina xwe wiha berdewam kir; “Ev mijar mijarekî miroviye û nabe ku bi pêvajoya çareseriyê ve girêdayî bibe mijara bazarê. Ji ber ku Tirkiye divê mijarê de hatiye mehkûmkirin.”
22 sal in têkoşîna mafê hêviyê tê dayîn
Rojger Ant biryara ku 11 sal berê der barê Rêberê Gelê Kurd Abdullah Ocalan de hatiye dayîn bi bîr xist û wiha dirêjî da axaftina xwe; “22 sal in ji bo parastina mafê hêviyê parêzer têdikoşin. 22 sal in parêzerên Birêz Ocalan ji bo mafê hêviyê têdikoşin. Ev mijar îro ketiye rojeva Komîteya Wezîrên Konseya Ewrûpayê. Li Tirkiyeyê cara ewil bi serlêdana Ocalan re Tirkiye hat mehkûmkirin. Ev li Tirkiyeyê biryara yekemîn e. Piştre gelek serlêdan çêbûn û niha nêzî 4 hezar girtî li bende ne ku ev maf têkeve meriyetê.”
‘Lazim e Birêz Ocalan bigihije azadiya fîzîkî’
Rojger Ant herî dawî da zanîn ku Tirkiye li gorî rewşa siyasî nêzî biryarê dibe û wiha bi dawî kir; “Heyf û mixabin em vê mijarê li ser pêvajoya çareseriyê dixavin. Ev mijar ne mijarek bi pêvajoyê ve gire bidin. Ev 11 sal in Tirkiye hatiye mehkûmkirin. Lê Tirkiye vê mijarê bi rewşa siyasî ve girê dide. Em cardin dibêjin. Mijara mafê hêviyê ne mijara nîqaş û bazarê ye. Divê serî de Birêz Abdullah Ocalan û girtiyên din yên em biryar derbarê wan de daye bigehijin azadiya xwe ya fîzîkî.”
