Platforma Jinan a Wanê, têkildarî geşedanên dawî yên di dosyeya Rojîn Kabaîşê de meşeke girseyî li dar xist û daxwaz kir ku delîl bi baldarî werin berhevkirin û di vê pêvajoyê de malbat û civak bi awayekî rast û di wextê xwe de werin agahdarkirin.
Platforma Jinan a Wanê, têkildarî geşedanên dawî yên di dosyeya Rojîn Kabaîşê de meşeke girseyî li dar xist. Girse li ber Wan AVMê kom bû û bi pankarta “Ji bo Rojinê edalet! Ji bêcezatîyê, bêdengiyê û pergala dewleta mêr re êdî bes e!” û dowîzên “em ji bo Rojînê edaletê dixwazin”, “derengmayîna edaletê, bêedaletî ye”, “em edaletê dixwazin” û gelek dowîzên din heta Qada Bajêr meşiyan. Girseyê, dirûşmeyên “Jin jiyan azadî”, “mêr lêdixe, dewlet diparêze” û “rektor îstîfa” berz kirin û bertek nîşanî îhmalkariya rêveberiya zanîngehê da. Hevşaredara Bajarê Mezin a Wanê Neslîhan Şedal, Parlamentera Partiya Wekhevî û Demokrasiyê ya Gelan (DEM Partî) ya Wanê Gulderen Varli, endamên platformê û gelek jin beşdarî meşê bûn.
‘Hêj jî telefona Rojînê nehatiye vekirin’
Girseyê li Qada Bajêr daxûyanî da û li ser navê platforma jinan Meryema Arslan metna daxûyaniyê xwend. Meryema Arslanê, diyar kir ku ew ji bo ku bibin dengê Rojînê, ji bo dîtina sûcdaran û ji bo hemû jinan derdikevin kolanan û got: “Salek e di lêpirsîna mirina gumanbar a Rojîn Kabaîşê de ti pêşketin çênebûye û telefona Rojînê hîn jî nehatiye vekirin, daneyên wê yên dîjîtal nehatine lêkolînkirin. Çima li dijî rayedarên zanîngeh û wargehan ti tedbîrek nehatiye girtin? Ev pirs salek e bêbersiv dimînin.”
Daxwazên xwe rêz kirin
Meryema Arslanê diyar kir ku ew ê têkoşîna xwe ji bo Rojîn Kabaîşê û hemû mirinên jinan ên gumanbar bidomînin û daxwazên xwe wiha rêz kir: “Em lêpirsîneke zelal û bibandor dixwazin. Divê delîl bi baldarî werin berhevkirin û di vê pêvajoyê de winda nebin, divê hêzên ewlehiyê hemû berpirsiyariyên xwe bicîh bînin, divê di vê pêvajoyê de malbat û civak bi awayekî rast û di wextê xwe de werin agahdarkirin. Em daxwaz dikin ku dozên ‘mirinên gumanbar’ ne bi girtina wan, bi zelalkirina wan bi hemû rastiyan ve werin ronîkirin.
‘Bila bîranîna Rojînê agirê têkoşîna me be’
Meryema Arslanê wiha dawî li axaftina xwe anî: “Em dizanin ku edalet ne tenê di dadgehê de ye, di dengê kolanan, hêza hevgirtinê û têkoşîna hevpar a jinên ku baweriya xwe bi hev tînin de jî heye. Em ê vê têkoşînê ji bo Rojînê, ji bo hemû jinên ku hatine kuştin, bêdengkirin û paşguhkirin bidomînin. Bila bîranîna Rojînê agirê têkoşîna me be.”
Piştî daxuyaniyê, jinan 5 deqeyan çalakiya rûniştinê li dar xist. Piştre Dengbej Meryem Tûncer stranek li ser têkoşîna Rojîn û malbata wê ya ji bo edaletê got û çalakî bi dawî bû.
