Stenbol – Serokê Şaxa Egîtîm Senê ya Hejmara 2yemîn a Stenbolê Hanîfî Bayindir derbarê êrişên li ser dibistanên de diyar kir ku temaşekirina film û rêzefîlmên mafyatîk, medyaya civakî ya bêbinî û bêsînor, lîstikên dîjîtal ên şer, pevçûn dibin sedemên tundiyê û got: “Li Tirkiyê tu qanûnek ku pêşî li bidestxistina çekan bigire tune ye. Hêviya zarokan ji xwendinê nemaye û ji dibistanan dûr dikevin.”
Di 14ê Nîsanê de li navçeya Siwêregê ya Rihayê kesek êrişî Lîseya Pîşeyî û Teknîkî ya Anadoluyê ya Ahmet Koyuncu kiribû. Di encama êrîşê de 10 xwendekar, 4 mamoste, 1 karkerê kantînê û polîsek birîndar bûbûn.
15ê Nîsanê jî li Dibistana Navîn a Ayser Çalik a li Mereşê kesek bi êrişî dibistanê kir. Di êrişê de 9 mamoste û xwendekar hatin kuştin û gelek kes jî birîndar bûn. Li dijî êrişan bertek û çalakiyên sazî û sendikayên mamosteyan berbelav dibin.
Serokê Şaxa Egîtîm Senê ya Hejmara 2yemîn a Stenbolê Hanîfî Bayindir derbarê êrişan de ji ajansa me re axivî.
‘Pirsgirêkên civakî û aborî nehatine çareserkirin lewma encamên trajîk rû didin’
Hanîfî Bayindir diyar kir ku ev êriş ne pirsgirêka şexsî ye, pirsgirêka civakî, aborî û derûniyê ye û wiha got: “Ji ber ku pirsgirêkên civakî û aborî nehatine çareserkirin, lewma encamên wisa trajîk rû didin. Baweriya hikûmetê bi pergaleke perwerdehiya laîk û zanistî tune ye. Ji ber vê bêbaweriyê her dem hewl dide ku naveroka vê pergala perwerdehiyê vala bike, ji ber vê jî li welêt bi hezaran dibistanên olî ango îmam hatîban vekiriye û ciwanan qanalîzeyî van dibistanan dike.”
‘Li Tirkiyê tu qanûnek ku pêşî li bidestxistina çekan bigire tune ye’
Hanîfî Bayindir destnîşan kir ku her ku diçe zarok ji dibistanan dûr dikevin û ev yek anî ziman: “Li Tirkiyê tu qanûnek ku pêşî li bidestxistina çekan bigire tune ye. Ji ber vê yekê bidestxistina çekan tiştekî hêsan e, gelemperî zarok ji ber ku malbatên wan xizan in. Bi sedema vê yekê jî hêviya zarokan ji xwendinê nemayê û ji dibistanan dûr dikevin. Temaşekirina film û rêzefîlmên mafyatîk, medyaya civakî ya bêbinî û bêsînor, lîstikên dîjîtal ên şer, pevçûn û tundî dibin sedemên xerakirina derûniyê û tundiyê.”
‘Divê mafê mamosteyan ê qanûnî were xurtkirin’
Hanîfî Bayindir anî ziman ku divê demildest bergiriyên ewlehiyê bên girtin û axaftina xwe wiha bi dawî kir: “Piştre jî divê axaftin û nêzîkatiya wezaret û rayedarên dewletê derbarê mamosteyan de bi awayekî pozîtîf bê guherîn. Divê mafê mamosteyan ê qanûnî were xurtkirin. Wezîrê perwerdehiyê û kesên eleqedar divê bi biryardarî piştevaniya mamosteyan bikin.”
