Fermandariya Navendî ya Amerîkayê diyar kir ku ferma dorpêça deryayî ya li ser Îranê îro saet di 17:00an de dest pê dike.
Piştî têkçûna muzakereyên Îslamabadê, Serokê Amerîkayê Donald Trump qonaxeke nû û xetere ya şer da destpêkirin. Trump ragihand ku ew ê îro bi fermî dest bi ablukaya deryayî ya li dijî Îranê bikin û her wiha diyar kir ku ew operasyoneke leşkerî ya sînordar jî dinirxînin.
Ablukaya tam li ser Hurmuzê
Fermandariya Navendî ya Amerîkayê (CENTCOM) bi fermî ragihand ku li gorî biryara Trump, îro saet di 17:00an de dê li Tengava Hurmuz ablukayeke tam a deryayî dest pê bike. CENTCOMê diyar kir ku ev abluka dê li dijî hemû keştiyên ku diçin bendergehên Îranê an jî jê derdikevin were sepandin û tu cudahî naxin navbera welatan. Hat gotin ku keştiyên bazirganî yên welatên din ên herêmê nayên sekinandin.
Trump: Vegera wan ya ser maseyê ne xema min e
Donald Trump berî ku biçe baregeha Andrews, ji rojnamegeran re axivî û helwesteke pir tund nîşan da. Trump got: “Vegera wan ya ser maseya muzakereyê ne xema min e. Heke venegerin jî pirsgirêk nîne.” Trump dubare kir ku ew ê tu carî rê nedin Îran bibe xwedî çekên nukleerî û got: “Yên ku naxwazin Îran petrolê bifiroşe, her ku diçe zêde dibin.”
Trump ji NATOyê dilşikestiye
Trump careke din nerazîbûna xwe ya li hemberî NATOyê anî ziman û diyar kir ku ew pir dilşikestî ye. Trump wiha domand: “Em trîlyon dolaran didin NATOyê, lê dema pêdiviya me pê hebû ew li cem me
nebûn. Em ê vê rewşê bi awayekî pir cidî binirxînin.”
WSJ: Operasyoneke nû ya bombekirinê di rê de ye
Li gorî nûçeya rojnameya Wall Street Journal (WSJ), Trump piştî têkçûna muzakereyan, vebijêrka “operasyoneke leşkerî ya sînordar” daniye ser maseyê. Tê gotin ku armanca vê operasyonê ew e ku zexteke nû li ser rejîma Tehranê ava bikin da ku di tura nû ya muzakereyan de Amerîka destê xwe xurt bike.
IMF: Hurmuz dibe mîna Bab el-Mendeb
Dîrektora Giştî yê IMFê Kristalina Georgieva hişyarî da ku krîza li Tengava Hurmuz dikare bibe rastiyeke nû ya domdar. Georgîeva bal kişand ser Tengava Bab el-Mendeb ku piştî êrîşên Hûsiyan trafîka wê ya deryayî ji sedî 50 kêm bûye û heta niha nehatiye ser xwe. IMF hişyarî dide ku heke Hurmuz bi temamî were girtin, dê bihayê petrolê derkeve ser 120 dolarî û ev yek dê bibe karesateke aborî ya cîhanî.
