Li Şengalê, bi hatina meha Nîsanê re yekemîn pîrozbahiyên Cejna Çarşema Serê Nîsanê ku wekî “Sersala Êzidiyan” tê qebûlkirin, bi coşeke mezin destpê kirin. Meclîsa Gel a Şengalê jî bi peyamek dîtbarî cejn pîroz kir.
Li Şengalê pîrozbahiyên Cejna Çarşema Serê Nîsanê destpêkirin. Cejna ku wekî Cejna Feqîran jî tê zanîn her sal bi çalakiyên cur bi cur tê pîroz kirin. Civaka Êzidî ya li Şengalê, cejna ku nîşaneya nûbûna xwezayê û destpêka salê ye, bi rengên biharê re kirin yek. Duh êvarê, tebeqeya Feqîran û gelek malbatên Şengalî dest bi amadekariyên cejnê kirin; hêkên ku sembola afirandina cîhanê ne bi rengên xwezayî hatin xemilandin û kulîlkên sor ên Nîsanê li ber deriyên malan hatin danîn.
Meclîsa Gel bi kurtefîlmekê cejn pîroz Kir
Meclîsa Gel a Şengalê jî bi boneya cejnê peyameke taybet weşand. Meclîsê bi dîmenên ku wekî kurtefîlmekî hatine amadekirin û rêûresmên koka Êzidatiyê nîşan didin, cejna Çarşema Serê Nîsanê li tevahî civaka Êzidî pîroz kir. Di peyamê de girîngiya parastina çand û baweriya resen a Şengalê hate destnîşan kirin û hate xwestin ku civak nasname, çand, rêûrismên xwe biparêze.
Serdanên cejnê pêk tên
Pîrozbahiyên îro bi seredanên malbatan destpê kir. Tê payîn ku piştî nîvro li gelek deverên Şengalê gel kom bibe û bi gerandina govendên gelerî cejna xwe bi coşeke geştir pîroz bike.
Her wiha li gel pîrozbahiyên Çarşema Feqîran/Çarşema Serê Nîsanê, di 15ê Nîsanê de jî pîrozbahiyên Çarşema Bavê Şêx ku li Iraqê wekî roja fermî tê qebûlkirin, dê li perestgeha Laleşê û li her derê civaka Êzidî lê heyî, merasîmên fermî werin pêk anîn.
