Li gundê Koço yê Şengalê, ji bo şêniyên gund ên di komkujiya 15ê Tebaxa 2014an de jiyana xwe ji dest dane, merasîmeke bîranînê hat lidarxistin.
Ji bo kesên di komkujiya li gundê Koço ya DAIŞê di 15ê Tebaxa 2014an pêk anîbû, jiyana xwe ji dest dane, bernameya bîranînê hat lidarxistin. Tevî gel, parlementerên Êzidî, endamên partiyên siyasî, Bavê Şêx, Bavê Çawîş gelek kesayet beşdarî merasîma bîranînê bûn.
Merasîma ku bi deqeyeke rêzgirtinê destpêkir. Axiverên tev li bîranînê bûne komkujî şermezar kirin. Tevî ku 12 sal li ser komkujiya ku DAIŞê pêk anîbû derbas bûne jî, cihê gora piraniya qurbaniyan nayên zanîn.
Derbarê bûyerê de
DAIŞê di 15ê Tebaxa 2014an de li gundê Koço yê ku dikeve başûrê çiyayê Şengalê li dijî Êzidiyan komkujî pêk anî. Di vê komkujiyê de bi sedan mêr û xort hatin qetilkirin, jin û zarok hatin revandin û weke kole hatin firotin. Ev êrîş dibe beşek ji qirkirina mezin a Êzidiyan. Di encamê de zêdetirî 400 zilam û xortên gund piştî ku ji jin û zarokan hatin veqetandin, bi komî hatin gulebarankirin û avêtin gorên komî. Bi hezaran jin û zarok jî hatin dîlgirtin û revandin. Gelek jin di bazaran de wek kole hatin firotin.
Piştî rizgarkirina herêmê, gelek gorên komî li gundê Koço hatin dîtin û cenazeyên şêniyên gund piştî salan bi merasîman hatin veşartin.
