Platforma Demokrasiyê ya Gimgimê, bi pêşengtiya Komeleya Ekolojiyê, li dijî projeyên Santralên Enerjiya Jeotermal (JES) panelek bi ser navê “Gimgim JESê naxwaze” li dar xist.
Platforma Demokrasiyê ya Gimgimê bi pêşengiya Komeleya Ekolojiyê bi ser navê “Gimgim JESê naxwaz e” panelek li dar xist. Di panelê de ku li eywaneke dawetê ya navçeyê hat lidarxistin, pankarta “Erdê me nayê firotin” hat vekirin. Endazyarê Metalurjiyê Cemalettîn Kuçuk, pisporê Jeolojiya Tibî Eşref Atabey û Parêzer Ahmet İnan wekî axaftvan beşdarî panelê bûn. Di bernameyê de bandorên neyînî yên santralan ên li ser jîngehê, tenduristiya zindiyan û binesaziya sosyo-ekonomîk a herêmê hatin nîqaşkirin.
‘Wekî şewitandina gundên salên 90î ye’
Di panelê de ewilî Parêzer Ahmet Înan bal kişand ser xetereya koçberkirinê û got: “Cih û warên ku hûn bi sedan sal in lê sewalkariyê dikin û debara xwe pê dikin, ji destê we digirin. Cudahiya vê yekê ji şewitandina gundan û koçberkirina salên 90î nîn e. Tenê niha vê yekê di bin navê hiqûq û sermayeyê de dikin. Dema em dibêjin ‘koçberkirin’, em mezin nakin, rastî ev e. Ev proje mîna vîrusê ne. Heke li Gimgimê çend projeyên jeotermalê pêk werin, ew ê bi vê tenê nemînin. Şîrket niha berxwedana gel dipîvin. Heke hûn niha dengê xwe dernexin, ev proje wê bigihêjin hezaran û gav bi gav gund û malên we desteser bikin.”
‘Em ê jiyana xwe neterikînin’
Dû re Cemalettin Kuçuk jî di axaftina xwe de destnîşan kir ku pirsgirêk ne tenê jeotermal e û got: “Wekî her derê Tirkiyeyê, li vê erdnîgariyê jî serê we di belayê de ye. Lê gelo ev tê wê wateyê ku em ê dev ji vir berdin û herin? Na, em ê jiyana xwe neterikînin.”
“JES hêlînên mîkroban in’
Pisporê Jeolojiya Tibî Eşref Atabey jî bal kişand ser xetereyên tenduristiyê û angaştên “refahê” yên şîrketan derewand. Eşref Atabey ev yek anî ziman: “Ev gotinên di raporan de tenê rêbazên îknakirina gel in. Germav û tesîsên jeotermalê mîna ‘hêlînên mîkroban’ in. Welatiyên ku ji bo şîfayê diçin van deran, nexweş dikevin. Di hewzên girtî de tebeqeyên rûnê kom dibin û ew av rasterast gefê li tenduristiya mirovan dixwe.”
Panel bi beşa pirs û bersivan bi dawî bû.
