Li gundê Kuyê yê navçeya Pasûrê ya Amedê li dijî projeya madenê ya dixwazin li hewza avê ya Kasorê bê çêkirin, civînek hat lidarxistin. Hevşaredarê Pasûrê Murat Îpek bal kişand ser girîngiya têkoşîna hiqûqî û got: “Em ê bi hev re vê têkoşînê mezin bikin û xwedî li qadên xwe yên jiyanê derkevin.”
Li hewza avê ya Kasor a gundê Kuyê yê navçeya Pasûra Amedê projeya madenê di rojevê de ye. Li dijî projeya madenê li gundê Kuyê civînek hat lidarxistin. Tevî şêniyên gund, Hevşaredarê Pasûrê Mûrat Îpek, endamên meclisa şaredariyê, muxtar, nûnerên partiyên siyasî û Berdevkê Komîsyona Ekolojiyê ya Baroya Amedê Ahmet Înan tev li civînê bûn.
Hevşaredarê Pasûrê Murat İpek di civînê de axivî û ev tişt gotin: “Em li vir hatine cem hev da ku zirara vê projeyê ya li ser jiyana xelkê xwe nîqaş bikin û bi mafên xwe yên hiqûqî û demokratîk ve têkoşîneke hevpar bidin destpêkirin. Herêma Kasorê hewza avê ye ku ava vexwarinê ya 10 hezar kesî dabîn dike. Her wiha qada jiyanê ya hezaran kesî ye ku debara xwe bi çandinî û sewalkariyê dikin. Çêbûna zirar û ziyaneke li vir, dê rasterast bandorê li jiyana deh hezaran kesî bike. Çikandina çavkaniyên avê, ji bo mirovan û hemû zindiyên li herêmê metirsiyeke mezin e. Em dizanin ku maden di jiyana mirovan de hene û girîng in. Divê pêşî jiyana mirovan û xwezayê bê parastin, paşê xebatên din bêne kirin. Em ê bi hev re vê têkoşînê mezin bikin û xwedî li qadên xwe yên jiyanê derkevin.”
Beşdarên civînê jî diyar kirin ku ew ê di her qonaxê de piştgiriyê bidin vê têkoşîna hiqûqî û demokratîk.
