Li Başûrê Kurdistanê mamoste û xwendekar ji bo piştgiriyê bidin Rojava li gelek bajaran daketin qadan. Kampanya alîkariyê ya ji bo Rojava jî her roj zêde dibe.
Gelê li Başûrê Kurdistanê, ji bo piştgiriya bi Rojava re bi rojan e li qadan e. Gel bi çalakiyan û qampanyayên alîkariyê ji bo piştgiriyê bi gelê Rojava re bike, seferber bûye. Wezareta Perwerdeyê ya Herêma Başûrê Kurdistanê duh bi daxuyaniyekê ragihandibû ku ji bo piştgiriya bi Rojava re wê îro li dibistanan di dersên destpêkê de qala berxwedana Rojava û mijara yekîtiya neteweyî ya Kurd bê kirin. Ji roja destpêkê ya berxwedana li Rojava û vir ve li zanîngehan çalakiyên girseyî têne lidarxistin. Li aliyê din, welatiyên dilxwaz, rêxistinên civakî yên sivîl û partiyên siyasî kampanyayên xwe yên ji bo alîkariyê bênavber dewam dikin.
Li Çemçemal dîroka Kurdan hate vegotin
Li dibistanên bajarokê Çemçemal waneya yekem li ser piştgiriya Rojava, netewe û dîroka gelê Kurd veqetandin û mamosteyan bi xwendkaran re dîroka gelê Kurd, têkoşîn û berxwedana Rojavayê Kurdistanê nîqaşkirin.
Xwedekaran pêşengeh vekir
Li Dibistana Seretayî ya Sîrwan a Helebçeyê weke li dibistanên din di dersa destpêkê de mijara berxwedana Rojava hate nirxandin. Xwendekaran bi baldariyeke mezin li dersê guhdarî kirin. Mamosteyan
qala girîngiya berxwedanê kirin.
Pêşengeha şoreşê hate vekirin
Her wiha li Helebceyê pêşangehek bi navê ‘Kezî’ hat vekirin. Di tabloyan de keziyên şervanên jinên Kurd hatin xêzkirin û nîşandan. Jinan gotin: Keziyên li ser tabloyan şeref û rûmete ku dijminan xwestin bi wan me biêşînin. Lê me bi kampanyek herî mezin karî devê dijminan bêdeng bikîn.” Li Dibistana Ehmed Muxtar Caf ya li Helebceyê pêşangehek hunerî hat vekirin. Di pêşangehê de tabloyên ku li ser keziyên şervanên jinên Kurd û berxwedana şervanên Rojava nîşan didan, hatibûn xêzkirin.
Xwendekaran dijminên Kurdistanê naskirin
Li navçeya Koye ya Hewlêrê li Lîseya Gomeşîn Şêxan bi dirûşma “Rojava û Rojhilatê Kurdistanê yek welat” xwendekaran berxwedana Rojava silav kirin. Mamosteyan di çalakiyê de bal kişandin ser êrişên çeteyên dewleta Tirk, DAIŞ û HTŞê û girîngiya hişmendiya neteweyî ya xwendekaran destnîşan kirin.
Li Hewlêrê çalakiya xwendekaran
Hîndekar û xwendekarên Zanîngeha Polîteknîk a Hewlêrê ji bo piştgiriya bi Rojava re çalakî lidar xistin. Di çalakiyê de ji her kesî hate xwestin ku ji bo piştgiriya bi Rojava re bikevin nava liv û tevgerê.
Silêmanî û Germiyan alîkariyê kom dikin
Li Zanîngeha Silêmaniyeyê, ji bo alîkariya bi Rojava re kampanya alîkariyê ya ji bo 5 rojan hate destpêkirin. Li Îdareya Serbixwe ya Germiyanê bi navê “Germiyan bi hawara Rojava ve digihêje” kampanya alîkariyê hate destpêkirin. Serokê Zanîngeha Silêmaniyê ragihand ku ew îro ji bo Rojavayê Kurdistanê kampanyayek alîkariyê didin destpê kirin û wê 5 rojan dewam bike. Li Başûrê Kurdistanê piştgiriya ji bo Rojavayê Kurdistanê dewam dike, divê çarçoveyê de zanîngeha Silêmaniyê kampanyayek alîkariyê da destpê kirin.
Serokê Zanîngeha Silêmaniyê Dr. Kosar Mihemed bi daxuyaniyek çapemeniyê despêkirina kampanyayê ragihand. Dr. Kosar wiha axivî: “Em îro kampanyaya alîkariyê ji bo Rojavayê Kurdistanê radigihînin û wê 5 rojan dewam bike. Wê li kampa nû û kevin ya zanîngehê, herwiha zanîngeha teknîkî ya Silêmaniyê, kampa zanîngeha Çarçira û Peymangeha Teknîkî ya Silêmaniyê alîkarî bên komkirin.” Serokê Zanîngeha Silêmaniyê bang li hemû welatî, mamosta, xwendevan û karmendan kir ku tevlî kampanyayê bibin da ku alîkariyek ji bo Rojava were dayîn.
