Înisiyatîfa Yekitiya Demokratîk derbarê geşedanên li Başûrê Kurdistanê de daxuyaniyek weşand û xwest ku aliyên li Başûr pirsgirêkan bi rêya diyalogê çareser bikin.
Beriya çend rojan, piştî 2 salan Parlamentoya Herêma Federal a Kurdistanê cara ewil li hev civiya û Seroka Meclîsa Parlamentoya Başûr hilbijart. Piştî vê yekê Serokê YNKê Bafil Talabanî daxuyaniyek da û got ew ji Hikûmeta Başûr vekişiyane.
Înisiyatîfa Yekitiya Demokratîk li ser hesabê xwe yê medyaya dîjîtal daxuyaniyek derbarê vê geşedanê de da û xwest ku pirsgirêkên heyî bi rêya gotûbêjê were çareserkirin.
‘Ev pirsgirêk statuya Kurdan têxe talokeyê’
Înisiyatîfa Yekitiya Demokratîk got ku gelê Başûrê Kurdistanê bi berdêlên giran statuya îro bi dest xistiye û ev tişt anîn ziman: “Xwişk û birayên me yên li Başûrê Kurdistanê, bi berxwedaneke berdêlgiran statuya xwe bi dest xistin. Lê mixabin ku ji ber pirsgirêkên navxweyî, niqaşên li ser statuya Başûrê Kurdistanê jî derketin holê. Duh çawa ku çavên hemû Kurdistaniyan li ser Rojavayê Kurdistanê bûn, vê carê jî çavên her kesê Kurdperwer li Başûrê Kurdistanê ye. Lewra gelê me bi fikar e ku pirsgirêkên di navbera hêzên Kurd de kûrtir bibin û statuya Kurd a li Başûrê Kurdistanê lawaz were xistin.”
‘Em banga diyalog û hevgirtinê dikin’
Înisiyatîfa Yekitiya Demokratîk got ku divê partiyên siyasî yên Başûr berjewendiyên takekesî nefikirin û wiha bi dawî kir: “Em bi fikar û bi xemgînî geşedenên neyînî yên li Başûrê Kurdistanê diqewimin, dişopînin. Lê baweriya me ew e ku her du hêzên Kurd YNK û PDKê dê karibin pirsgirêkên xwe yên navxweyî bi rêya diyalogê çareserî bikin. Lewra di nava şert û mercên dijwar ên li Rojhilata Navîn de dem ne dema berjewendiyên takekesî yan partîyî ye, dem dema desthevgirtinê ye da ku gelê Kurdistanê were parastin. Divê neyê jibîrkirin ku Başûrê Kurdistanê, statuya xwe bi saya peymaneke stratejîk a hevpar bi dest xist. Her çiqas di ser re bi dehan sal jî derbas bin, divê peymana stratejîk a di navbera partiyên li Başûr de ji holê neyê rakirin, berevajî vê divê bi armanca xurtkirina peymanên yekitiyê werin nûjenkirin. Di vê çarçoveyê de banga me li xwişk û birayên me yên li Başûrê Kurdistanê ye ku rêya diyalog û lihevkirinê heta dawiyê vekin û di nava xwe de yekîtiya demokratîk ava bikin.”
