Duh nûnerên partî û rêxistinên siyasî, çalakvan û kesayetên Rojhilat li Navenda KNKê ya li Brukselê Civîna Lêkolîna Rewşa Niha ya Îran û Rojhilatê Kurdistanê lidar xistin.
Di 24ê Çileya 2026an de nûnerên partî û rêxistinên siyasî, çalakvan û kesayetên Rojhilat li Navenda Kongreya Neteweyî ya Kurdistanê (KNK) ya li paytexta Belçîka Brukselê Civîna Lêkolîna Rewşa Niha ya Îran û Rojhilatê Kurdistanê lidar xistin. Encanmeya civînê bi daxuyaniyekê hate ragihandin.
Daxuyaniya têkildarî civînê:
“Em wek nûnerên partî û rêxistinên siyasî, hejmarek çalakvan û kesayetên Rojhilatê Kurdistanê û her wiha Kongreya Neteweyî ya Kurdistanê ku di vê civînê de amade bûn, xemgîniya mezin û hêrsa xwe li dijî zêdebûna tundiyê li Îran û Kurdistanê radigihînin.”
Daxuyanî ji bo bo tundiya Îranê jî dibêje:
“Di çend hefteyên borî de, rejîma Îranê bi kuştina berfireh, girtina girseyî, militarîzekirina herêman û bi qutkirina sistematîk a rêyên têkiliyê bi derveya welêt, zordariya xwe li hemû welatiyên Îranê zêde kir. Herêmên cuda yên Kurdistanê û Îranê bûne hedefa tundiya dewletê.”
Ji bo yekîtiyê jî daxuyaniyê wiha got:
“Di van demên biryardar de, yekîtiya Kurdî pêdiviyeke pêwist û neçariye. Belavbûna navxweyî û têkçûna rêzê hêza bersivdayîna gelê Kurd li dijî krîzên mezin bi giranî lawaz kiriye. Em wek beşdarên vê civînê, ji hemû partî û rêxistinên Kurdistanê, bi taybetî yên li Rojhilata Kurdistanê, daxwaz dikin ku berî bûyerên biryardar, berpirsiyariya komelî bikin ser bingehê hemû çalakiyên xwe.”
Di daxuyaniyê de hat gotin ku Rojava jî hat nirxandin û mijar wiha anî ziman:
“Di heman demê û wek Rojhilatê Kurdistanê, Rojavayê Kurdistanê jî bi xetereyekê mezin re rû bi rû ye. Ligel rêzgirtin û nirxdayîna hevgirtina giştî ya gelên hemû parçeyên Kurdistanê, beşdarên civînê li ser xetereya hebûna tecrûbeya Rojava hişyarî didin. Bê guman, hilweşandina tecrûbeya serkeftî ya Rojava dê ji bo netewa Kurd karesateke mezin be û di heman demê de têkçûnek ji bo berpirsiyariya cîhanî. Lê di dawiyê de, ya ku li Rojava tê xuyakirin, ji bo Rojhilat jî ders û têgihiştinên stratejîk ên giran dihewîne.”
Li gorî van rastiyan van pêşniyarên pratîk pêşkêş dikin:
* Hewldanên ciddî û bi lez ji bo pêşxistina hevkariyê di nav partiyên Rojhilat de, heta asta yekgirtinê û çêkirina hêzeke parastinê ya hevpar,
* Çêkirina mekanîzmayeke lezgîn a hevrêziyê di nav aktorên siyasî yên Navenda Diyalogê de ji bo sazûmanîkirina vê navendê,
* Çêkirina şaxên “Navenda Dîyalogê” li derveyî Herêma Kurdistanê, bi taybetî li Ewropayê,
* Xurtkirina torên medyayê yên Kurdî û bi taybetî hewldana ji bo damezrandina medyayeke giştî û berfireh a nepartî,
* Hewldanên lezgîn ji bo lidar xistina konferansekê li ser Rojhilatê Kurdistanê, bi beşdariya hemû hêzên siyasî, rêxistinên civakî û çalakvanan,
* Hewldana ji bo çêkirina platformeke siyasî ya fireh bi navê “Navenda Biryardanê” yan jî navek din a wisa, ji bo girtina berpirsiyariya biryardanê li ser hemû mijarên bingehîn ên siyasî û dîplomatîk ên Rojhilat,
* Hewldana ji bo rêxistinkirina aksiyoneke gel a hevpar li Ewropayê bi bangdana Navenda Diyalogê û bi beşdariya Kurdên hemû parçeyên Kurdistanê ji bo piştgirîkirin û berbiçavkirina îradeya siyasî ya gelê Rojhilat,
* Çêkirina bingeheke daîmî ji bo diyaloga berdewam di nav partiyan, ronakbîran û civaka sivîl de li hemû parçeyên Kurdistanê,
* Hewldana ji bo înîsiyatîfeke cîhanî ya hevrêz ji bo çalakî û dîplomasiya li ser pirsgirêka Kurdî
* Rêxistinkirina piştgirî û hevgirtinên cîhanî li ser Rojhilat û Rojavayê Kurdistanê.
Netewa Kurd li ber deriyê guherînekê dîrokî de ye. Tenê yekîtî, diyalog û çalakiya hevbeş rêyên rizgarbûnê, parastina rûmetê û pêkanîna pêşerojeke adil in.”
