Li navçeya Bismilê ya Amedê, bi pêşengiya MEBYA-DERê ji bo cangoriyên meha Gulanê bernameya bîranînê hate lidarxistin.
MEBYA-DER bernameyên bîranîna cangoriyên meha gulanê didomîne. Bi pêşengiya MEBYA-DERê li navçeya Bismilê ya Amedê cangoriyên doza azadiya Kurdistanê hatin bibîranîn. Bername li avahiya Rêxistina DEM Partiyê ya Bismilê hae lidarxistin. Di bernameyê de Hevserokên DEM Partî û DBP yên navçeyê, endamên partiyê, Dayikên Aştiyê û gelek welatî amade bûn.
Bîranîn bi deqeyeke rêzgirtinê ji bo bîranîna cangoriyên têkoşîna azadiyê dest pê kir û piştre sînevizyona ku li ser jiyan û têkoşîna cangoriyan hatibû amadekirin, hate nîşandan.
‘Em ê xwedî li têkoşîna wan derkevin’
Di bîranînê de Hevserokê MEBYA-DERa Amedê Ramazan Dengîz axivî û bal kişand ser pêvajoya Aştî û Civaka Demokratîk û anî ziman ku meha Gulanê di dîroka têkoşînê de xwedî cihekî girîng e.
Ramazan Dengîz banga xwedîderketina li mîrateya cangoriyan kir û wiha got “Hevrêyên me yên ku di meha Gulanê de jiyana xwe ji dest dane, ji bo rûmet û azadiyê canê xwe feda kirin. Em ê weke şopdarên wan, heta dawiyê xwedî li têkoşîn û bîranînên wan derkevin û armancên wan pêk bînin.”
