Bi boneya salvegera Rojiya Mirinê ya 14ê Tîrmehê li ber Zindana Amedê daxuyaniyek hate dayîn. Hevserokê MEBYA-DERê Ramazan Dengîz diyar kir ku Wezareta Çandê dixwaze di bin navê “Muzeya Bîranînê Ya Çand û Hunerê” de şopa îşkenceyan û rastiya dîrokî ya li Zindana Amedê veşêre û got: “Divê Wezareta Çandê daxwaza civakê li ber çavan bigire û vê derê veguherîne ‘Muzeya Bîra Mirovahiyê’.”
Komeleya Yekîtî, Çand, Piştevanî û Alîkariyê ya Malbatên ku di Dergûşa Şaristaniyê de Xizmên Xwe Winda Kirine (MEBYA-DER) ya Amedê, Komeleya Piştevanî û Alîkariyê ya bi Malbatên Girtî û Hikumxwaran re (TUAY-DER) ya Amedê û Hewldana 78an di salvegera Rojiya Mirinê ya 14ê Tîrmehê ya li Zindana Amedê de li ber deriyê zindanê daxuyanî dan. Şahidên berxwedanê, endam û rêveberên saziyên sivîl ên civakî û nûnerên partiyên siyasî di nav de gelek kes tev li daxuyaniyê bûn. Di daxuyaniyê de dirûşmên “Bijî Berxwedana Zindana” û “Şehîd Namirin” hatin berzkirin.
‘Gelê Kurd tu carî li ber înkarê serî netewandiye’
Hevserokê MEBYA-DERê Ramazan Dengîz di daxuyaniyê de axivî û bal kişand ser dîroka berxwedana gelê Kurd û destnîşan kir ku hemû serhildan û raperînên Kurdan ji Şêx Seîd, Seyîd Riza heta Elîşer û Zerîfe Xanimê li dijî neheqî, înkar û qirkirinê pêk hatine. Ramazan Dengîz wiha got: “Berxwedana Zindana Amedê dema ku êrişên li hemberî çand, ziman û nasnameya gelê Kurd dest pê kirin, bi pêşengiya Mazlûm, Kemal, Xeyrî, Akîf û Eliyan bersiveke dîrokî hate dayîn. Gotinên wan ên wekî ‘Berxwedan Jiyan e’ û ‘Dema mirim li ser gora min binivîsin ji gelê xwe re deyndar e’ rengê xwe da 50 salên dawî yên têkoşîna azadiyê.”
‘Peyama aştiyê ya birêz Ocalan manîfestoya jiyana hevpar e’
Ramazan Dengîz di berdewamiya daxuyaniyê de destnîşan kir ku ev têkoşîn rê li ber banga aştiyê vekiriye û diyar kir ku Rêberê Gelê Kurd Abdullah Ocalan di 27ê Sibata 2025an de peyameke dîrokî pêşkêş kiriye û got: “Ev peyama ‘Aştî û Civaka Demokratîk’ manîfestoya jiyana hevpar û wekhev e. Birêz Ocalan bi vê bangê rê li ber pêvajoyeke aştiyane vekir ku tê de PKKê dawî li şerê çekdarî anî û çekên xwe şewitandin. Em bang li rayedarên dewletê dikin ku bi lezgînî bersivê bidin vê bangê da ku hemû gelên li Tirkiyeyê bikaribin bi nasname û çanda xwe bi hev re bijîn.”
‘Em avakirina muzeyeke li gorî hişmendiya dewletê qebûl nakin’
Hevserokê MEBYA-DERê Ramazan Dengîz herî dawî bal kişand ser hewldanên Wezareta Çandê yên li ser Zindana Amedê û diyar kir ku dixwazin di bin navê “Muzeya Bîranînê Ya Çand û Hunerê” de şopa îşkenceyan û rastiya dîrokî veşêrin û wiha dawî li axaftina xwe anî: “Bêyî ku nêrîna gel û kesên ku ew hovîtî dîtine û jiyane were girtin, avakirina muzeyeke li gorî hişmendiya dewletê dê ji aliyê me ve tu carî neyê qebûlkirin. Divê Wezareta Çandê daxwaza civakê li ber çavan bigire û vê derê veguherîne ‘Muzeya Bîra Mirovahiyê’. Em di salvegera 14ê Tîrmehê de, di kesayetiya lehengên Rojiya Mirinê ya Mezin de hemû cangoriyên azadiyê bi rêzdarî bi bîr tînin.”
Daxuyanî bi berzkirina dirûşmeyan û bi avêtina qerenfîlên nav zindanê bi dawî bû.
