Li Amedê ji bo endama YJA-STARê Şeyma Ûlûdag (Evîndar Zîlan) û endamê HPGê Mehmet Mazlûm Ateş (Adil Amed) bernameya bîranînê hate lidarxistin. Di bîranînê de peyama xurtkirina yekîtiya gelê Kurd hate dayîn.
Bi pêşengiya Komeleya Yekîtî Çand Piştevanî û Alîkariyê ya bi Malbatên ku di Dergûşa Şaristaniyê de Xizmên Xwe Winda Kirine re (MEBYA-DER) a Amedê ji bo endama YJA-STARê Şeyma Ûlûdag (Evîndar Zîlan) û endamê HPGê Mehmet Mazlûm Ateş (Adil Amed) ku li cih û demên cuda de jiyana xwe ji dest dane, mewlût hate xwendin û bernameya bîranînê hate lidarxistin. Bernameya ku li Mala Şînê ya Haci Kadrî Davûtoglu ya Dîclekentê ya Peyasê hate lidarxistin, rêveberên MEBYA-DERa Amedê, Dayikên Aştiyê, rêveberên saziyên sivîl, rêveberên partiyên siyasî û gelek kes tev li bîranînê bûn.
Di bernameyê de dirûşmeyên “Şehîd namirin”, “Bijî Serok Apo” hate berzkirin. Di bîranînê de ji bo şehîdan deqîqeyek rêz hate girtin û sirûda “Çerxa Şoreşê” hate xwendin. Paşê jî axaftin hatin kirin û li sînevîzyon ji bo bîranîna cangoriyan hatibû amadekirin, hate temaşekirin.
‘Nifşên me yên nû keda wan bizanibin’
Hevserokê MEBYA-DERê Ramazan Dengîz di axaftina xwe de bal kişand ser keda cangoriyan û wiha got: “Ji bo herdû malbatên me em sersaxiyê dixwazin. Gelek caran me got em deyîndarên wanin. Şehîdên me karê xwe kirin. PKKê bi awayekî statejîk çek berdan û derbasî merheleya dîplomasiyê bû. Bi vî re xebatên Pêvajoya Aştî û Civaka Demokratîk destpê kir. Niha jî em wek gel û taybetî jî malbatên şehîdên me bi her dû destan xwedî vê pêvajoyê derkevin. Pêwîste ku em şehîdên xwe ji bîr nekin. Divê nifşên me yên nû her tim navê şehîd û keda wan ji bîr nekin û bizanibin.”
‘Wêrekî û têkoşîna jinên Kurd di rûyê wê de xuya dike’
Xalê Şeyma Ûlûdagê, Xalit Ozbaş jî destnîşan kir ku Evîndar Zîlan bi têkoşîna xwe di nav dilê gelê Kurd de cih girtiye û wiha axivî: “Îro dema em li wêneyên şehîd Evîndar Zîlan dinêrin di rûyê wê de wêrekbûn, hêz û tekoşîna jinên Kurd xuya dike. Roja ku tev li refên gerilla bû wê sozek dabû û gotibû, ‘ Ez ê her tim li pêş bibim û gavek paşve neavêjim’. Heya roja ku şehîd ket li ser soza xwe sekinî. Ew bi têkoşîn û berxwedana xwe di nav dilê gelê Kurd de cihê xwe girt. Ew ne tenê şehîda me ye şehîda temamî gelê Kurd e.”
‘Daxwaza me ew e ku gelê Kurd bibe yek’
Birayê Mehmet Mazlûm Ateşî, Aydin Ateş jî di axaftina xwe de bal kişand ser yekîtiya gelê Kurd û kesayetiya Mehmet Mazlûm Ateş. Aydin Ateş da zanîn ku daxwaza wan ew e ku gelê Kurd êdî bibe yek û wiha got: “Spasiya xwe ji saziya MEBYA-DERê re dikim da ku ew ji bo şehîdê me ked dide. Wekî hûn dizanin pêvajoyek heye û daxwaza me ew e ku temamî gelê Kurd bi saya serê vê pêvajoyê bibe yek. Heval Mazlum mirovekî pir jêhatî û delal bû. Bila serê hemû gelê Kurd sax be.”
