Şirnex – Li Herêma Besta bi destê cerdevanan birîna daran berdewam dike. Li Çiyayê Bestayê di dîmenên dawî xuya dike ku birîna daran heta 30 kîlometreyî berdewam dike û darên hatine birîn ji bo firotinê dane ser hev û bi trakroran dibin bajarên cuda.
Li Şirnexê bi salane ji aliyekî ve birîna daran û ji aliyê din ve jî bi lêgerîna petrol û kanên komir û madenên cur bi cur xweza tê talankirin. Li Şirnexê û navçeyên wê birîna daran bi germbûna hewayê re careke din dest pê bikir û bê navber berdewam dike. Herêmên ku ji aliyê walitiyê Şirnexê ve bi hinceta, “Ewlehiyê” hatine qedexekirin û welatiyên Şirnexê bi destûr dikarin biçin wan deveran. Li van deveran bê navber dar tên birin. Dar ji aliyê cerdevanan ve tên birîn û ewlehiya wan jî leşker digirin. Herêma Besta ku bi daristanên xwe yên nav û deng e û tê zanîn, bi salan e bê navber dar tên birin û qadeke berfireh a daristanê hatiye tunekirin. Di dîmenên dawî yên hatin ber destê me me de jî xuya dike ku birîna daran heta 30 kîlometreyî berdewam dike û darên tên birîn jî dane ser hev û ji bo firotinê bi traktoran dibin bajarên cuda.
Dîmenê birîna daran
Di dîmenan de xuya dike ku li qadek berfireh dar hatine birîn û dane ser hev. Li şûna ku berhevkirina daran, traktor jî hene û wan daran dikişînin. Li rêyeke dirêj ku heta 30 kîlometreyî berdewam dike, seranserî rê dar tên birîn. Li keleka rê daran didin ser hev. Di van darên ku dane ser hev de jî xuya dike dar li qadek berfireh hatine birîn. Her wiha di dîmenan de jî xuya dike ku li qadek berfireh a Bestayê dar hatine birîn. Ev dever wek cihekî beyar xuya dike.
31 qadan bê navber dar tên birin
Birîna daran li herêma Besta ya bi ser navenda Şirnexê ve dest pê dike û heta sînorê Sêrtê qadeke berfireh a daristanan tê tunekirin. Li gorî çavkaniyên xwecihî agahî dan herî kêm li 31 qadan bênavber dar tên birîn. Deverên ku dar lê tên birîn ev in: Girêsêvê, Baçûka, Çemê Mezin, Girê Heliziyê, Şehrewan, Piştreşo, Kaniya Rengîn, Çala Fileyan, Nizarê Kuştiyan, Kaniya Kurta Dizan, Warên Şeref, Kemaloga, Zirvî, Kîxê, Piha, Girê Gavan, Çala Tehla, Nizarê Elî Sorkê, Nala Kitkê, Qaranîs, Cinîwer, Kaniya Mîr, Rîsor, Çemê Benê, Rêrêqut, Banga, Xaşîxan, Girê Qirsîn, Bindarîn, Xargirê û Belûzê.
Daristanên Şirnexê tên tunekirin
Ji bilî herêma Bestayê, li Çiyayê Cûdî û Çiyayê Gabarê û li gelek gundên navçeyên Elkê û Qilebanê birîna daran bê navber berdewam dike. Li herêmên ku dar lê tên birîn vêguherîne çolistanê. Li gor daneyên Platforma Ekolojiyê ya Şirnexê sedî 8ê daristanên Şirnexê hatine tunekirin. Lê ew dane 4 sal berê hatibûn parvekirin û hat zanîn di van 4 sal an de ew dane 2 qat zêde bûn e. Lê ji ber qedexeyan, lêkolîn li wan herêman nayê kirin ku tespîta daneyên nû were kirin.
